မိုင်းရူပ၊ ဖေဖော်ဝါရီ ၂၃ ရက်၊ ပြည်
ပဲခူးတိုင်း ပြည်အကျဉ်းထောင်မှာ အကြောင်းပြချက်မရှိဘဲ နိုင်ငံရေးအကျဉ်းသားတချို့ကို ထောင်အာဏာပိုင်တွေက ရိုက်နှက်ခဲ့ရာ နိုင်ငံရေးအကျဉ်းသား ၅ ဦး ဒဏ်ရာ ရခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်- PPNM ဆီက သိရပါတယ်။
ဒီနေ့ ဖေဖော်ဝါရီ ၂၃ ရက် မနက် ၇ နာရီခွဲခန့် ပြည်အကျဉ်းထောင်ရဲ့ အကျဉ်းထောင်စားရိပ်သာ တာဝန်ခံ ဖိုးခေါင်ဆိုသူက အကျဉ်းသားတစ်ဦးကို အကြောင်းပြချက်မရှိဘဲ ရိုက်နှက်ခဲ့ရာ ကျန်နိုင်ငံရေးအကျဉ်းသား ၁၀၀ ခန့်က ဖိုးခေါင်ဆိုသူကို အရေးယူပေးဖို့ တောင်းဆိုရာကနေ အကျဉ်းထောင် ဗဟိုကင်းကနေ သေနတ် ၂ ချက် ပစ်ဖောက်ခဲ့ပါတယ်။
အဲဒီနောက်မှာ အကျဉ်းထောင် တာဝန်ရှိသူတွေရဲ့ စေခိုင်းမှုနဲ့ နိုင်ငံရေးအကျဉ်းသားတွေကို ရိုက်နှက်ခဲ့တာ ဖြစ်ပါတယ်။
နိုင်ငံရေးအကျဉ်းသားတွေကို ဝါးဆစ်တုတ်၊ သစ်သားတုတ်နဲ့ ဓားတွေ အသုံးပြုကာ ရိုက်နှက်ခဲ့တာဖြစ်ပြီး နိုင်ငံရေးအကျဉ်းသား ၅ ဦးဟာ ဖူးယောင်ဒဏ်ရာ၊ ဦးခေါင်း ပေါက်ပြဲဒဏ်ရာ၊ ခြေထောက် ပေါက်ပြဲ ပွန်းပဲ့ဒဏ်ရာတွေ ရရှိခဲ့ပါတယ်။
“ဆေးဝါး ကုသခွင့် ပေးဖို့တော့ တင်ပြထားပြီး အရေးယူမှုလည်း လုပ်ဆောင်ပေးမယ်လို့ နောက်ဆုံး သိထားရပါတယ်ဗျ။ အရင်ကလည်း ဖိနှိပ်တာမျိုးတော့ ရှိပါတယ်။ ဒီအခေါက်က ပိုဆိုးပါတယ်” လို့ PPNM ရဲ့ တာဝန်ရှိသူ ကိုသိုက်ထွန်းဦးက ရွှေဖီမြေကို ပြောပါတယ်။
နိုင်ငံတဝန်းရှိ အကျဉ်းထောင်တွေမှာ နိုင်ငံရေးအကျဉ်းသားကို စစ်ကောင်စီရဲ့ အကျဉ်းထောင်ဝန်ထမ်းက ရိုက်နှက်တာ၊ ဆေးကုသခွင့် မရလို့ နိုင်ငံရေးအကျဉ်းသားတွေ သေဆုံးတာတွေ မကြာခဏ ဖြစ်ပွားနေပါတယ်။
စစ်တပ် အာဏာသိမ်းပြီး ၄ နှစ်နီးပါးအတွင်း ဖမ်းဆီးခံရတဲ့ အရပ်သားနဲ့ ဒီမိုကရေစီအရေး တက်ကြွလှုပ်ရှားသူ ၂၈,၀၀၀ ကျော် (၂၈,၆၃၇ ဦး)ရှိပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း- AAPP ရဲ့ ဖေဖော်ဝါရီ ၂၁ ရက်က ထုတ်ပြန်တဲ့ စာရင်းအရ သိရပါတယ်။
