ယာရူစိင်၊ မတ်လ ၂၂ ရက်၊ တောင်ကြီး
စစ်ကောင်စီတပ် ထိန်းချုပ်ထားတဲ့ ရှမ်းတောင် တောင်ကြီးမြို့က လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးဌာန (လဝက) ရုံးမှာ ရှမ်းမြောက်က မှတ်ပုံတင်သွားလုပ်တဲ့ ဒေသခံတချို့က မှတ်ပုံတစ်ခုရဖို့ကို လချီပြီး ကြန့်ကြာမှုတွေ ရှိနေတာကြောင့် အခက်တွေ့နေကြတယ်လို့ သိရပါတယ်။
တောင်ကြီးမြို့မှာ မှတ်ပုံတင်လုပ်ရဖို့ကို ၂ လကျော်ကြာတဲ့အထိ စောင့်ဆိုင်းပေမယ့် သွေးနှောဆိုပြီး လဝက ဖက်က လုပ်ဆောင်ပေးခြင်းမရှိဘူးလို့ ကိုယ်တိုင်ကြုံတွေ့ခဲ့ရသူ အမျိုးသမီးတစ်ဦးက ရွှေဖီမြေကို ပြောပါတယ်။
“မှတ်ပုံတင်လုပ်တာကို လဝကရုံးက အချိန်ဆွဲတယ်ပြောရမှာပေါ့။ တိုက်နယ်မှူးကတော့ လက်ဗွေနှိပ်ပေးတယ်။ သွေးနှောဖြစ်နေလို့ အထက်လူကြီးနဲ့ တွေ့ရမယ်ဆိုပြီး ရက်ချိန်းယူရတယ်။ ချိန်းယူထားတဲ့နေ့ကို သွားတော့လည်း မတွေ့ပေးဘူး။ အမြဲတမ်း နေပူထဲ သွားရပ်စောင့်ရတယ်။ မှတ်ပုံဆိုတာလည်း လူတိုင်းမရှိမဖြစ် လုပ်ရတာမို့ လုပ်နေရတာပါ”
လက်ရှိအခြေအနေအရ ရှမ်းမြောက်ကနေ ရှမ်းတောင်အထိရောက်ဖို့ကို ကုန်ကျစရိတ်တွေ သိန်းဆယ်ချီရှိတာကြောင့် အခုလို ကြန့်ကြာမှုတွေ ရှိနေတဲ့အပေါ် ပိုပြီးခက်ခဲစေတယ်လို့ ပြောပါတယ်။
နောက်ထပ် ကြုံတွေ့ခဲ့သူတစ်ဦးကလည်း “ကျနော်တို့လဲ လမ်းစရိတ်နဲ့ တည်ခိုးစရိတ်နဲ့တင် သိန်း ၃၀ လောက်ကုန်နေပြီ။ ဒါတောင် ခုထိ မရသေးဘူးလေ။ လူမျိုးခြားမို့တဲ့။ ဖြစ်သင့်လား။ ကိုးကန့်ဒေသဖက်ကဆို သိန်းဆယ်ချီအထက်ဘဲ”လို့ ပြောပါတယ်။
တောင်ကြီးအထိ မှတ်ပုံတင်သွားလုပ်ကြတဲ့ ရှမ်းမြောက်က ဒေသခံတချို့ မှတ်ပုံတင်တစ်ခုရဖို့ကို တစ်ဦး ကျပ်ငွေ ၆ သိန်းအထိ ပေးနေရတာတွေလည်း ရှိနေပါတယ်။
