ရဲမာန်၊ ဇူလိုင် ၁၆ ရက်၊ မော်ချီး
ကရင်နီပြည်နယ် ဖားဆောင်းမြို့နယ် မော်ချီးဒေသမှာ လေကြောင်းဒဏ်ကြောင့် ဒေသခံတချို့ နေရပ်စွန့်ခွာမှု ရှိလာတယ်လို့ ဒေသခံအမျိုးသမီးက ရွှေဖီမြေကို ပြောပါတယ်။
ဇူလိုင် ၁၄ ရက် နေ့လယ် ၂ ရက်မှာ စစ်ကောင်စီတပ်က လေကြောင်းကနေ တိုက်ခိုက်ခဲ့တဲ့ တောင်ပေါ်ရွာမှာ နေထိုင်သူ ၁၀ အိမ်တောင် မရှိတော့ဘူးလို့ ၎င်းအမျိုးသမီးက ပြောပါတယ်။
“မကြာမကြာ လာနေတော့ လုပ်စားဖို့လည်း အဆင်မပြေဘူးလေ။ အရေးထဲ ကုန်ဈေးနှုန်းက တက်နေတယ်။ ဒီနေ့တောင် ကင်းထောက်လေယာဉ်လာတာ ၃ ကြိမ် ရှိပြီ”
မော်ချီးဒေသမှာ နေထိုင်သူ အနည်းအကျဉ်းသာ ကျန်ရှိတော့တယ်လို့ သူမက ဆက်ပြောပါတယ်။
မနေ့ ဇူလိုင် ၁၅ ရက် မနက်အစောပိုင်း ၁ နာရီခန့်မှာ မော်ချီးဒေသ လိုဘာခိုခေါ် လေးထပ်ကွေ့ရွာကို ဂျက်ဖိုက်တာနဲ့ ပေါင် ၂၀၀ ဗုံး ၂ လုံး ကြဲချတိုက်ခိုက်ရာ ဒေသခံ ၆ ဦး ဒဏ်ရာရပြီး နေအိမ် ၁ လုံး ပျက်စီးခဲ့ပါတယ်။
ဇူလိုင် ၁၄ ရက်က တောင်ပေါ်ရွာကို လေကြောင်းနဲ့ တိုက်ခိုက်ခဲ့ရာ အရပ်သား ၆ ဦး သေဆုံးပြီး ၃ ဦး ဒဏ်ရာ ရရှိခဲ့ပါတယ်။
ဇူလိုင် ၉ ရက်ကလည်း လိုလော်ထီးရွာကို ပေါင် ၂၀၀ ဗုံး ၂ လုံး ကြဲချတိုက်ခိုက်ရာ ဒေသခံ ၆ ဦး သေဆုံးခဲ့ပြီး ဇွန်လ ၂၅ ရက်က မော်ချီးဒေသ ရပ်ကွက် ၁၅ ရှိ ခဲကျင်းကို ဗုံးကြဲချတိုက်ခိုက်ခဲ့လို့ ဒေသခံ ၇ ဦး သေဆုံးပြီး ၄၀ ကျော် ဒဏ်ရာ ရရှိခဲ့ပါတယ်။
မော်ချီးဒေသကို စစ်တပ်က လေကြောင်းကနေ တိုက်ခိုက်နေတာဟာ ၈ ကြိမ်မြောက် ရှိပြီဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
