မိုင်းရူပ၊ မတ်လ ၃၀ ရက်၊ မိုးကုတ်
မန္တလေးတိုင်း မိုးကုတ်မြို့မှာ စက်သုံးဆီဆိုင်တချို့ ဆီစတင်ပြတ်လပ်နေပြီး ဆီတစ်လီတာကို ၁ သောင်းအထိ မြှင့်တက်လာတယ်လို့ ဒေသခံတွေက ရွှေဖီမြေကို ပြောပါတယ်။
ငလျင်ဘေးကြောင့် မန္တလေး၊ စစ်ကိုင်းဘက်ကနေ မိုးကုတ်မြို့သို့ ဆီတင်သွင်းလို့ မရတော့တာကြောင့် လက်ကျန် စက်သုံးဆီတွေကို ရောင်းချနေရပြီး ငလျင် လှုပ်ခတ်မှုမဖြစ်ခင်က မိုးကုတ်မှာ ဓာတ်ဆီ တစ်လီတာကို ၆ ထောင်ဝန်းကျင် ရှိရာကနေ ဒီနေ့ မတ်လ ၃၀ ရက်မှာ ၁ သောင်းကျော်အထိ စျေးတက်လာတာ ဖြစ်ပါတယ်။
“ဆီတွေ မဝင်တော့ဘူးလို့ ပြောတယ်။ တချို့ဆိုင်တွေ ပြတ်နေပြီ။ ဆီက စစ်ကိုင်း၊ မန္တလေးတို့ဘက်ပဲ လာတာ။ အရင်က ပုံးအဝါ ၁ ပုံး (၂၀ လီတာ)ကို တစ်သိန်းနှစ်သောင်းပဲ ရှိတယ်။ ဒီနေ့ သွားဝယ်တာ ၂ သိန်းကျော်တဲ့” လို့ ဒီနေ့မှာ ဓာတ်ဆီ သွားဝယ်တဲ့ မိုးကုတ်ဒေသခံတစ်ဦးက ရွှေဖီမြေကို ပြောပါတယ်။
မတ်လ ၂၈ ရက် နေ့လယ် ၁ နာရီဝန်းကျင်မှာ မန္တလေးမြို့ အရှေ့မြောက်ဘက် ၁၂ မိုင်အကွာကို ဗဟိုပြုပြီး လှုပ်ခတ်ခဲ့တဲ့ ငလျင်ဟာ မန္တလေးတိုင်းမှာ ထိခိုက်သေဆုံးမှု များပြီး နေပြည်တော်၊ စစ်ကိုင်းတိုင်းနဲ့ ရှမ်းတောင်မှာလည်း ထိခိုက်မှု များခဲ့ပါတယ်။
မန္တလေးတိုင်းမှာ ထိခိုက်သေဆုံးမှု အများဆုံးဖြစ်ပြီး မနေ့ မတ်လ ၂၉ ရက်အထိ ငလျင်ဒဏ်ကြောင့် ထိခိုက်သေဆုံးသူရဲ့ အလောင်း ၈၀၀ ကျော် တွေ့ရှိထားပြီး ဒီနေ့မှာလည်း သေဆုံးသူရဲ့ အလောင်းတွေကို ဆက်လက် ရှာဖွေနေပါတယ်။
မတ်လ ၂၉ ရက် ညနေပိုင်းအထိ နိုင်ငံတစ်ဝန်းမှာ ငလျင် လှုပ်ခတ်မှုကြောင့် သေဆုံးသူ ၁,၆၄၄ ဦးနဲ့ ဒဏ်ရာရသူ ၃,၄၀၈ ဦး ရှိလာပြီလို့ စစ်ကောင်စီက ထုတ်ပြန်ထားပါတယ်။
