မိုင်းရူပ၊ ဧပြီ ၇ ရက်
ရှမ်းတောင် ကလောနဲ့ သာစည်မြို့နယ်အစပ်က ငလျင်ဘေးဒဏ် သင့်ခဲ့ရတဲ့ ကျေးရွာတချို့မှာ ၁၀ ရက်ကျော်ကြာတဲ့အထိ အကူအညီမရသေးဘူးလို့ ဒေသခံတွေက ရွှေဖီမြေကို ပြောပါတယ်။
ငလျင်ဘေးဒဏ်သင့်တဲ့ ကျေးရွာတွေထဲမှာ ပိန္နဲပင်ရွာ၊ ရွှေမင်းဖုန်း၊ တောင်ပဲ့၊ စေတီတောင်ရွာနဲ့ စေတီမြောက်ရွာတွေဖြစ်ပြီး ပျက်သွားတဲ့နေအိမ် ၂၀၀ နီးပါးရှိနိုင်ပြီး အဲဒီထဲမှ ပျက်စီးမှုအများဆုံးဟာ ပိန္နဲပင်နဲ့ ရွှေမင်းဖုန်းကျေးရွာက ဖြစ်တယ်လို့ ဆိုပါတယ်။
လက်ရှိမှာ ဒေသခံတွေ နေ့စဥ်စားသောက်ဖို့ ရွာခံအချင်းချင်း ကူညီတာရှိပြီး ပြန်လည်ထူထောင်ရေးအတွက် သွပ်ပြားအပါအဝင် အိမ်ဆောက်ပစ္စည်းတွေ အဓိက လိုအပ်နေတယ်လို့ တောင်ပဲ့ရွာဘုန်းကြီးက ရွှေဖီမြေကို မိန့်ပါတယ်။
“ပိန္နဲပင်နဲ့ စေတီတောင်ရွာက တော်တော်လေး ပျက်စီးသွားတယ်။ အိမ်လုံးဝပျက်သွားတဲ့ အိမ်တွေက အမျိုးတွေဆီမှာ သွားနေကြတယ်။ အစားအသောက်ကတော့ အဲလောက်ထိ မလိုဘူး။ ပြန်လည်ထူထောင်ရေးအတွက် အုတ်၊ သွပ်၊ ဘိလပ်မြေတို့ လိုတာပါ့”
စေတီတောင်ရွာမှာလည်း ငလျင်ဘေးဒဏ်ကြောင့် နေအိမ်အားလုံးနီးပါး ပျက်စီးပြီး လက်ရှိအချိန်အထိ အကူအညီတွေ မရသေးပဲ ပျက်စီးသွားတဲ့ နေအိမ်တွေ ပြည်လည်ထူထောင်ဖို့အတွက် အကူအညီတွေ လိုအပ်နေတယ်လို့ စေတီတောင်ရွာခံ အမျိုးသမီးတစ်ဦးက ဆိုပါတယ်။
“အလှူရှင်ကတော့ ဘာမှမရောက်ဘူး။ ကျမတို့ရွာဆိုရင် အိမ်ခြေ ၁၆၀ ကျော်ရှိတယ်။ ၃ အိမ်လောက်တော့ လုံးဝပျက်စီးသွားတယ်။ ကျန်တဲ့အိမ်တွေက မပြိုပေမယ့် ဘယ်လိုမှ သုံးလို့မရတော့ဘူး”
ပြီးခဲ့တဲ့ မတ်လ ၂၈ ရက်မှာ ပြင်းအား ၇.၇ အဆင့်ရှိတဲ့ ငလျင်လှုပ်ခတ်မှုကြောင့် စစ်ကိုင်း၊ မန္တလေး၊ နေပြည်တော်နဲ့ ရှမ်းတောင်တွေမှာ သေဆုံးသူ ထောင်နဲ့ချီရှိခဲ့ပြီး အထင်ကရနေရာတွေအပါအဝင် အဆောက်အဦးတွေလည်း ထိခိုက်ပျက်စီးခဲ့ပါတယ်။
လက်ရှိအချိန်ထိ နေရာတချို့မှာ ကူညီကယ်ဆယ်ရေး ဆက်လုပ်နေပြီး မထုတ်နိုင်သေးတဲ့ အလောင်းတွေလည်း ဆက်ရှိနေပါတယ်။
စစ်ကောင်စီရဲ့ ဧပြီ ၆ ရက်အထိ စာရင်းအရ နိုင်ငံတစ်ဝန်းမှာ ငလျင်ကြောင့် သေဆုံးသူ ၃,၅၆၄ ဦးနဲ့ ဒဏ်ရာရသူ ၅,၀၁၂ ဦးရှိပြီး ပျောက်ဆုံးနေသူ ၂၁၀ ဦး ရှိတယ်လို့ ထုတ်ပြန်ထားပါတယ်။
