ခိုင်လေး၊ မတ်လ ၁၅ ရက်၊ ရေး
မွန်ပြည်နယ် ရေးမြို့အခြေစိုက် အမှတ်(၁၉) တပ်ရင်းမှာ တာဝန်ထမ်းဆောင်နေတဲ့ တပ်ကြပ်ကြီးတစ်ဦးအပါအဝင် စစ်သား ၆ ဦးက လက်နက်ခဲယမ်းနဲ့အတူ ရေးဘီးလူးတပ်ရင်းထံ မနေ့ မတ်လ ၁၄ ရက်မှာ အလင်းဝင်လာပါတယ်။
တပ်ကြပ်ကြီးက ၎င်းကိုင်ဆောင်ထားတဲ့ MA3 တစ်လက်နဲ့ ကျည်ဘောက် ၂ ခု၊ ကျည် ၆၀ နဲ့အတူ အလင်းဝင်ခဲ့တာဖြစ်ပြီး တပ်ကြပ်ကြီးကို ရေးဘီးလူးတပ်ရင်းက ကျပ်သိန်း ၃၀ ချီးမြှင့်ပေးခဲ့တယ်လို့ ရေးဘီးလူးအဖွဲ့ရဲ့ ပြောခွင့်ရသူ တပ်ရင်းမှူး ကိုထက်လှိုင်ဝင်းက ရွှေဖီမြေကို ပြောပါတယ်။
“ကျနော်တို့ဆီ အလင်းဝင်လာတဲ့ တပ်ကြပ်ကြီးက လက်နက် ပါတဲ့အတွက် ဆုငွေ သိန်း ၃၀ ဆုချတယ်။ သူတို့ရဲ့ သဘောဆန္ဒအတိုင်းတော့ လုပ်ပေးဖို့ ရှိတယ်။ အခု သူတို့ကို လုံခြုံတဲ့နေရာမှာတော့ ထား ထားတယ်။ သူတို့နဲ့ ထိပ်တိုက် မမေးရသေးဘူး။ မေးပြီးရင် သူတို့ ဖြစ်ချင်တာတွေကို ကျနော်တို့ဘက်က အခြေအနေတစ်ခုကြည့်ပြီး ဆောင်ရွက်ပေးဖို့ ရှိတယ်”
အလင်းဝင်လာသူတွေထဲက တပ်ကြပ်ကြီး တစ်ဦးသာ လက်နက်ခဲယမ်း ယူဆောင်လာတာဖြစ်ပြီး ကျန် ၅ ဦးက အပတ်စဥ် နိမ့်လို့ လက်နက် ထုတ်မရတာလို့ ဆိုပါတယ်။
ရေးဘီးလူးတပ်ရင်း ထူထောင်ပြီးနောက်ပိုင်း ရေးဘီးလူးတပ်ရင်းထံ အလင်းဝင်လာသူ စုစုပေါင်း ၂၀ ဦးဝန်းကျင် ရှိခဲ့ပြီလို့ ပြောဆိုပါတယ်။
ပြီးခဲ့တဲ့ ဖေဖော်ဝါရီလအတွင်း စစ်တပ်ဘက်က ဗိုလ်မှူးအဆင့်ရှိတစ်ဦး အပါအဝင် စစ်သားနဲ့ ရဲတပ်ဖွဲ့ဝင် ၆၄ ဦး ပြည်သူ့ရင်ခွင်ထံ ခိုလှုံလာတယ်လို့ အမျိုးသား ညီညွတ်ရေးအစိုးရ- NUG ရဲ့ ကာကွယ်ရေးဝန်ကြီးဌာနက မတ်လ ၃ ရက်မှာ ထုတ်ပြန်ပါတယ်။
