မိုင်းရူပ၊ ဧပြီ ၁ ရက်၊ အောင်ပန်း
ရှမ်းတောင် ကလောမြို့နယ် အောင်ပန်းမြို့က ဟိုတယ်အောင်ပန်း ပြိုကျမှုအတွင်း ပျောက်ဆုံးနေသူတွေကို ဆက်လက် ရှာဖွေနေပြီး ပျောက်ဆုံးနေသူတွေလည်း အသက်ရှင်နိုင်ခြေ နည်းတယ်လို့ ကယ်ဆယ်ရေးအဖွဲ့တွေက ရွှေဖီမြေကို ပြောပါတယ်။
ငလျင် လှုပ်ခတ်မှုဖြစ်ပြီး ၅ ရက်မြောက်နေ့ ဒီနေ့ ဧပြီ ၁ ရက်မှာ ပြိုကျနေတဲ့ အဆောက်အဦးကြားမှာ ပိမိနေသူတွေကို ဆက်လက်ရှာဖွေနေပြီး ပျောက်ဆုံးနေသူတွေရဲ့ မိသားစုဝင်တချို့ကလည်း လာရောက် စောင့်ဆိုင်းနေတယ်လို့ ဆိုပါတယ်။
“ပိတ်မိသူတွေက ရှိသေးတယ်။ ဆယ်လို့ မရသေးဘူး။ ရှာဖွေရေးကတော့ ဆက်လက်လုပ်ဆောင်နေတုန်းပဲ။ အဆောက်အဦးပျက်ကို ဖယ်ပြီးမှကို ရတော့မှာ အခုတော့ တောက်လျှောက် ဖယ်နေတယ်။ အခုက ၅ ရက်မြောက်နေ့ ရှိပြီဆိုတော့ အသက်ရှင်နိုင်ခြေတော့ နည်းတယ်” လို့ ကယ်ဆယ်ရေး လုပ်နေသူတစ်ဦးက ရွှေဖီမြေကို ပြောပါတယ်။
ပျက်စီးနေတဲ့ အဆောက်အဦးကြား ပိတ်မိနေသူတွေထဲ ဟိုတယ်အောင်ပန်းရဲ့ ဝန်ထမ်းအပါအဝင် ဟိုတယ်မှာ တည်းခိုနေတဲ့ ဧည့်သည်တွေလည်း ပါဝင်ပြီး အရေအတွက် အတိအကျကိုတော့ မသိရသေးဘူးလို့ သူက ဆက်ပြောပါတယ်။
မတ်လ ၃၁ ရက်အထိ ဟိုတယ်အောင်ပန်းမှာ သေဆုံးသူ ၉ ဦးရဲ့ အလောင်းကို တွေ့ရှိထားပြီး ၂၄ ဦးကို အသက်ရှင်လျက် ကယ်ထုတ်နိုင်ခဲ့ပါတယ်။
မတ်လ ၂၈ ရက်မှာ ဖြစ်ပွားခဲ့တဲ့ ငလျင် လှုပ်ခတ်မှုမှာ ရှမ်းတောင် အောင်ပန်းနဲ့ ညောင်ရွှေမြို့နယ် အင်လေးဒေသမှာလည်း ထိခိုက်သေဆုံးမှုရှိပြီး အင်းလေးဒေသမှာတင် သေဆုံးသူ ၉၀ နီးပါးအထိ ရှိနေပြီ ဖြစ်ပါတယ်။
စစ်ကောင်စီရဲ့ မနေ့ မတ်လ ၃၁ ရက်အထိ စာရင်းအရ နိုင်ငံတစ်ဝန်းမှာ ငလျင်ကြောင့် သေဆုံးသူ ၂,၀၅၆ ဦးနဲ့ ဒဏ်ရာရသူ ၃,၉၀၀ ဦးရှိပြီး ပျောက်ဆုံးနေသူ ၃၀၀ ရှိတယ်လို့ ထုတ်ပြန်ထားပါတယ်။
