ပျားကြီး၊ မေ ၂၆၊ စစ်ကိုင်း
စစ်ကိုင်းမြို့ပေါ်က အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ရဲ့နေအိမ်ဟာ ငလျင်ဒဏ်ကြောင့် ပျက်စီးမှုတွေရှိခဲ့တယ်လို့ ဒေသခံတွေက ရွှေဖီမြေကို ပြောပါတယ်။
အာဏာသိမ်းစစ်ခေါင်းဆောင်ရဲ့သားဖြစ်သူ အောင်ပြည့်စုံအမည်ပေါက်တဲ့ မင်းလမ်းရပ်ကွက်၊ ကမ်းနားလမ်းနဲ့ မင်းလမ်းထောင့်နားက အိမ်အမှတ် ၃၅၉ ဟာ အင်အားပြင်းစစ်ကိုင်းငလျင်ကြောင့် အဆောက်အဦးအတွင်းပိုင်းမှာ ထိခိုက်ပျက်စီးမှုတွေရှိခဲ့တာ ဖြစ်ပါတယ်။
“အိမ်ထဲမှာက သိန်းရာချီတန်တဲ့ ကျွန်းစားပွဲတွေရှိတယ်။ အဖိုးတန်ပစ္စည်းတွေအများကြီးပဲ။ အဲဒါတွေအတော်များများပျက်စီးကုန်တာ။ လူကတော့ခြံစောင့်ပဲရှိတော့ လူထိတာခိုက်တာမရှိဘူး”လို့ အနီးဝန်းကျင်မှာနေထိုင်တဲ့ဒေသခံတစ်ဦးက ပြောပါတယ်။
အဲဒီနေအိမ်ဟာ ၂၀၁၀ ပြည့်နှစ်ဝန်းကျင်ကတည်းက အာဏာသိမ်းစစ်ခေါင်းဆောင် မင်းအောင်လှိုင်က သားဖြစ်သူ အောင်ပြည့်စုံအမည်နဲ့ ဝယ်ယူခဲ့တာဖြစ်ပြီး ၁၅ နှစ်တာကာလအတွင်း လာရောက်လည်ပတ်နေထိုင်မှု မရှိသလောက်နည်းပါးခဲ့တယ်လို့ ဒေသခံတွေကဆိုပါတယ်။
လက်ရှိအချိန်မှာ အနီးအနားက ငလျင်ဒဏ်ကြောင့်ပြိုကျပျက်စီးခဲ့တဲ့ အဆောက်အဦတွေဟာ ဖြိုချရှင်းလင်းမှုတွေပြုလုပ်နေပေမဲ့ အဲဒီအိမ်အမှတ် ၃၅၉ ကတော့ စစ်ကောင်စီဝင်အရာရှိတချို့မကြာခဏလာရောက်စစ်ဆေးမှုတွေပြုလုပ်နေတာကလွဲပြီး ဖြိုချဖျက်စီးမယ့်အရိပ်အယောင်တွေတော့ မရှိသေးဘူးလို့ မျက်မြင်တွေ့ရှိသူတွေက ပြောပါတယ်။
ငလျင်ဒဏ်သင့်ခဲ့တဲ့ စစ်ခေါင်းဆောင်မင်းအောင်လှိုင်ရဲ့နေအိမ်ဟာပြိုကျပျက်စီးခဲ့တဲ့ ဧရာဝတီမြစ်ကူး အင်းဝတံတားနဲ့ ပေပေါင်း ၁၀၀၀ ဝန်းကျင်ပဲကွာဝေးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
