ရွှေဖီမြေ၊ ဖေဖော်ဝါရီ ၂၇ ရက်၊ ပဲခူး
ပဲခူးတိုင်း ဖြူးမြို့နယ်ထဲက ရန်ကုန်-မန္တလေး လမ်းဟောင်းပေါ်ရှိ စစ်ကောင်စီတပ် အခြေချ တပ်စွဲထားတဲ့ ဂိတ်စခန်း ၇ ခုကို တောင်ပိုင်းစစ်ဒေသ အမှတ် ၂ စစ်ဒေသခွဲ လက်အောက်ခံတပ်နဲ့ ကရင်တပ်မတော်- KNU/KNLA ပူးပေါင်းတပ်ဖွဲ့က ဖေဖော်ဝါရီ ၂၅ ရက်နဲ့ ၂၆ ရက်မှာတိုက်ခိုက်ချေမှုန်းခဲ့တယ်လို့ အမျိုးသားညီညွတ်ရေးအစိုးရ- NUG ရဲ့ ကာကွယ်ရေးဝန်ကြီးဌာနက ထုတ်ပြန်ထားပါတယ်။
စစ်စခန်းတွေကို PDF ရဲ့ တောင်ပိုင်းစစ်ဒေသ အမှတ် ၂ စစ်ဒေသခွဲ လက်အောက်ရှိ အမှတ် ၃၇၀၂၊ ၃၅၀၂ တပ်ရင်း၊ Spring Warrior Column တပ်ရင်း၊ အာဠာဝကစစ်ကြောင်း ၇၈၀၃၊ ဧရာဝတီစစ်ကြောင်း ၆၀၀၂ ၊ စစ်တောင်းစစ်ကြောင်း၊ ရန်ကုန် ပကဖ၊ ဖြူး ပကဖနဲ့ KNLA တပ်ရင်း ၉ တို့ ပူးပေါင်းပြီး တိုက်ခိုက်ခဲ့တယ်လို့ ဆိုပါတယ်။
တိုက်ခိုက်မှုကြောင့် စစ်ကောင်စီတပ်ဖွဲ့ဝင် ၈ ဦး သေဆုံးခဲ့ပြီး ၂ ဦး ထိခိုက်ဒဏ်ရာ ရခဲ့ကာ တော်လှန်ရေးတပ်ဖွဲ့ဘက်ကလည်း ရဲဘော် ၁ ဦး ကျဆုံးခဲ့တယ်လို့ ထုတ်ပြန်ချက်ထဲ ထည့်သွင်းဖော်ပြထားပါတယ်။
PDF အနေနဲ့ စစ်ရေးလှုပ်ရှားမှုကို တိုးမြှင့်ဆောင်ရွက်သွားမှာဖြစ်လို့ လူထုတွေအနေနဲ့ စစ်ကောင်စီတပ်ရဲ့ ဂိတ်စခန်းအနီးဝန်းကျင်ဘက် မလိုအပ်ဘဲ မသွားလာကြဖို့ NUG က အသိပေးချက် ထုတ်ပြန်ထားပါတယ်။
