ခိုင်လေး၊ မတ်လ ၇ ရက်၊ ချောင်းဦး
စစ်ကိုင်းတိုင်း၊ ချောင်ဦးမြို့နယ် မုံရွာ-မန္တလေး လမ်းတစ်နေရာမှာ စစ်ကောင်စီရဲ့ ယာဉ်တန်းကို ချောင်းဦးမြို့နယ် ပြည်သူ့ကာကွယ်ရေးတပ်ဖွဲ့ က ကြားဖြတ်တိုက်ခိုက်ခဲ့ရာ ဒုဗိုလ်ကြီးတစ်ဦး အပါအဝင်စစ်သား ၁၇ ဦးသေဆုံး ခဲ့တယ်လို့ CHU PDFက သတင်းနဲ့ ပြန်ကြားရေးတာဝန်ရှိခံ ကိုသန့်က ရွှေဖီမြေကို ပြောပါတယ်။
ပြီးခဲ့တဲ့ မတ်လ ၄ ရက် ညနေ ၃ နာရီကျော်ကမုံရွာမြို့တွင်းကနေ ထွက်လာတဲ့ သံပြားကာကား ၂ စီးက ချောင်းဦးမြို့ကို ဖြတ်ပြီး မြင်းမူဘက် ဦးတည်ထွက်ခွာစဉ် မုံရွာ-မန္တလေး လမ်းတနေရာမှာ တော်လှန်ရေး ပူးပေါင်းတပ်ဖွဲ့က စောင့်ကြိုမိုင်းဆွဲ ပစ်ခတ်တိုက်ခိုက်ခဲ့တာလို့ ဆိုပါတယ်။
“သတင်းရလို စောင့်ကြိုတိုက်ခိုက်ခဲ့တာပါ။ ကားနှစ်စီးထဲမှာ စစ်တပ်က ခန့်မှန်းအင်းအား ၃၀ ကျော် ၄၀ လောက်ရှိမယ်။ စစ်တပ်ဘက်က ဒုဗိုလ်အပါအဝင် ၁၇ ဦးသေဆုံးတယ်။ ကျနော်တို့ဘက် ရဲဘော် ၁ ဦး ဒဏ်ရာရခဲ့တယ်။ အခုတော့အဆင်ပြေ ပြီ။ မြေပြင်အခြေအနေက အခုလောလောဆယ်တော့ငြိမ်နေတယ်။ ဘာမှတော့ မဖြစ်သေးဘူး”
အဆိုပါ တိုက်ခိုက်မှုအတွင်း ချောင်းဦး မြို့ပေါ်ရှိ စစ်ကောင်စီ အထိုင်စခန်းဖြစ်တဲ့ စိုက်ကွင်းရုံးနဲ့ မြပုလဲ အထိုင်စခန်း ကနေ ၁၂၀ မမ လက်နက်ကြီး ၁၀၆ ကြိမ် ပစ်ကူပေးခဲ့သလို (နမခ) ကလည်း အင်ဂျင်တပ် လေထီးနဲ့ ၂ ကြိမ် လေကြောင်းပစ်ကူ ပေးခဲ့တယ်လို့ ဆိုပါတယ်။
စစ်ကောင်စီ တပ်ထံမှ သံပြားကာ ကား ၂ စီး၊ MA 1 ၄ လက်၊ MA 3 ၁ လက်၊ MA 11 ၃ လက်၊ G 3 တလက်၊ G 1 တလက်၊ 60 mm စိန်ပြောင်း တလက်၊ Lala တလက်၊ ကျည်ဘောက် မျိုးစုံ ၂၂ ဘောက်ကို သိမ်းဆည်းရရှိခဲ့ပြီး ကား ၂ စီးမှာ မောင်းမရတော့တာကြောင့် မီးရှို့ဖျက်စီး ခဲ့တယ်လို့ ဆိုပါတယ်။
ဒီတိုက်ခိုက်မှုမှာ ချောင်းဦးမြို့နယ် ပ.က.ဖ တိုက်ခိုက်ရေးတပ် CHU PDF ၊ ယင်းမာပင်မြို့နယ် ပ.က.ဖ လက်ရုံးတပ် ULF စစ်ကြောင်း၊ B21 တပ်ရင်း ၊ ရတနာပုံ ၊ Chindwin Brother ၊ Bandula Defence Force (ဘုတလင်) ၊ Three Brothers Force (ကနီ) ၊ Special Force 11 ၊ Immortal Guerrilla Force ၊ Sagaing District Drone Team (SDDT) တို့က ပူးပေါင်းဆောင်ရွက်ခဲ့တာ ဖြစ်ပါတယ်။
မုံရွာခရိုင် ချောင်းဦးမြို့မှာရှိတဲ့ ကျေးရွာအချို့တွေမှာ စစ်ကောင်စီတပ်နဲ့ တော်လှန်ရေးပူးပေါင်းတပ်ဖွဲ့တွေက ပြီးခဲ့တဲ့ ဖေဖော်ဝါရီလ (၁၅ ၊၁၆၊ ၁၇) သုံးရက်ဆက်တိုက် တိုက်ပွဲဖြစ်ခဲ့တာကြောင့် စစ်ကောင်စီတပ်သား ၂၃ ဦး သေဆုံးခဲ့ပြီး တော်လှန်ရေးရဲဘော်ဘက်မှ ၄ ဦး သေဆုံးခဲ့တယ်လို့ဆိုပါတယ်။
