လွေးထွေး၊ မတ်လ ၁၉ ရက်၊ တောင်ကြီး
ရှမ်းတောင် တောင်ကြီးမြို့မှာ နိုင်ငံသားစိစစ်ရေးကတ်ပြား (မှတ်ပုံတင်) သွားလုပ်တဲ့ ရှမ်းမြောက်က ဒေသခံတွေဟာ မှတ်ပုံတင်တစ်ခုရဖို့ တစ်ဦးကို ငွေကျပ် ၆ သိန်းအထိ ပေးနေရတယ်လို့ ကိုယ်တိုင်ပေးခဲ့ရသူ အမျိုးသားတစ်ဦးရဲ့ပြောပြချက်အရ သိရပါတယ်။
ရှမ်းမြောက် လားရှိုး၊ နမ္မတူ၊ နမ့်ဆန်နဲ့ မန်တုံ စတဲ့မြို့နယ်က ဒေသခံတွေဟာ ဒီ ၂၀၂၅ ခုနှစ် ဇန်နဝါရီလဆန်းပိုင်းကတည်းကနေ အခု မတ်လအထိ တောင်ကြီးမြို့ထိသွားပြီး ပွဲစားကနေတစ်ဆင့် မှတ်ပုံတင်တွေ သွားလုပ်ကြတာ ဖြစ်ပါတယ်။
နမ့်ဆန်မြို့နယ်မှ မှတ်ပုံတင်ကိုယ်တိုင်လုပ်ခဲ့သူ အမျိုးသားတစ်ဦးက “၆ သိန်းလောက်ပေးမှ လုပ်လို့ရတာဆိုတော့ ပေးရတာဘဲ။ ချက်ချင်းလည်း မရဘူး။ တစ်လနီးပါးလောက် စောင့်ရတယ်။ ပွဲစားကနေတစ်ဆင့်လုပ်တော့ ပွဲစားလည်းစား၊ လဝကလည်း စားတာပေါ့” လို့ ရွှေဖီမြေသို့ ပြောပါတယ်။
တိုက်ပွဲနောက်ဆက်တွဲအနေနဲ့ ရှမ်းမြောက်မှာ အလုပ်အကိုင်ရှားပါးလာပြီး လူငယ်အများစုက နိုင်ငံခြားသို့ ထွက်ခွာလိုကြတာကြောင့် မှတ်ပုံတင်မရှိသေးတဲ့ လူငယ်တွေက အခုလို ဈေးအဆမတန်ပေးပြီး မှတ်ပုံတွေ လုပ်ဆောင်နေကြရတာ ဖြစ်ပါတယ်။
နောက်ထပ် နမ္မတူမြို့နေ အမျိုးသမီးတစ်ဦးကလည်း “ကျွန်မတို့က ခရီးထွက်ဖို့ မှတ်ပုံတင်ကို အသိတွေကတစ်ဆင့် လုပ်တာ။ သူတို့က အသွားအလာခ၊ စာရွက်စာတမ်းခရော ဟိုဘက်ကို ပေးရမှာတွေပြောလို့ ၅ သိန်းကျော် ပေးခဲ့ရတာ။ ပြီးခဲ့တဲ့ ၁ လ ပိုင်းက လုပ်တာပါ” လို့ ပြောပါတယ်။
လတ်တလောမှာ ခရီးသွားလူထုတွေကို စစ်ကောင်စီတပ်က စစ်ဆေးတင်းကြပ်ပြီး မှတ်ပုံတင်မပါဘဲ ခရီးသွားပါက ဖမ်းဆီးစစ်ဆေး ရိုက်နှက်တာတွေရှိသလို ငွေတောင်းခံတွေလည်း ရှိနေကြောင်း ခရီးသွားလူထုတွေရဲ့ ပြောပြချက်အရ သိရပါတယ်။
ပြီးခဲ့တဲ့ ၂၀၂၄ ခုနှစ် ဒီဇင်ဘာလကလည်း တောင်ကြီးမှာ မှတ်ပုံတင်သွားလုပ်တဲ့ ရှမ်းမြောက်က တရုတ်၊ တအာင်း၊ ရှမ်း စတဲ့ လူမျိုးစုတွေထံ တောင်ကြီး (လဝက) က ငွေကျပ် ၂ သိန်းအထိ တောင်းခဲ့တာတွေရှိခဲ့ပါတယ်။
