မိုင်းရူပ၊ ဧပြီ ၂ ရက်၊ စစ်ကိုင်း
စစ်ကိုင်းတိုင်း စစ်ကိုင်းမြို့နယ် မင်းကွန်းတောင်ရိုးမှာ ငလျင်ကြောင့် ထိခိုက်သေဆုံးမှု များပြီး ၆ ရက် ကြာတဲ့အထိ ကယ်ဆယ်ရေးတွေ မရောက်သေးဘူးလို့ မင်းကွန်းတောင်ရိုးရှိ ဘုန်းကြီးတစ်ပါးက ရွှေဖီမြေကို မိန့်ပါတယ်။
ငလျင် လှုပ်ခတ်မှုကြောင့် မင်းကွန်းတောင်ရိုးရှိ ဘုန်းကြီးကျောင်းအပါအဝင် နေအိမ်အများစု ပျက်စီးခဲ့ပြီး ၆ ရက် ကြာတဲ့အထိ အဆောက်အဦးကြား ပိတ်မိနေသူတွေကို ကိုယ်ထူကိုယ်ထ ကယ်ဆယ်ရေး လုပ်နေရတယ်လို့ ဆိုပါတယ်။
“ဂူထဲမှာ ပိတ်မိနေတဲ့ အလောင်း ၃ လောင်းကို ကိုယ်ထူကိုယ်ထ ထုတ်နေတာ။ ၂ လောင်းတော့ ရပြီ။ ကယ်ဆယ်ရေးလည်း မလာတော့ အပျက်အစီးတွေ အများကြီးပဲ။ မင်းကွန်းမှာ ကျောင်းတိုင်းလိုလို ပျက်တယ်။ သေတဲ့အလောင်းတွေလည်း မကယ်ထုတ်နိုင်သေးဘူး” လို့ မင်းကွန်းတောင်ရိုးရှိ ဘုန်းကြီးတစ်ပါးက ရွှေဖီမြေကို မိန့်ပါတယ်။
စစ်ကောင်စီရဲ့ ပြောခွင့်ရသူ ဗိုလ်ချုပ် ဇော်မင်းထွန်းကတော့ နိုင်ငံတကာက ကယ်ဆယ်ရေးအဖွဲ့ဝင် ၁,၅၀၀ ကျော်အပါအဝင် ပြည်တွင်းက ကယ်ဆယ်ရေးအဖွဲ့တွေ ပူးပေါင်းပြီး ငလျင်သင့်တဲ့ နေရာတွေမှာ ကူညီကယ်ဆယ်ရေး ပြုလုပ်နေတယ်လို့ ပြောကြားထားပါတယ်။
ငလျင် လှုပ်ခတ်မှု ဖြစ်ပြီးနောက် ၆ ရက် ကြာလာတဲ့ ဒီနေ့ ဧပြီ ၂ ရက်အထိ ကူညီကယ်ဆယ်ရေးလုပ်ငန်း ဆက်လုပ်နေပြီး တချို့ကို အသက်ရှင်လျက် ကယ်ထုတ်နိုင်ခဲ့ပါတယ်။
ဒီနေ့ နေ့လယ်ပိုင်းအထိ စစ်ကောင်စီရဲ့ ထုတ်ပြန်ချက်အရ နိုင်ငံတဝန်းမှာ ထိခိုက်သေဆုံးသူ ၂,၈၈၆ ဦးနဲ့ ဒဏ်ရာရသူ ၄,၆၃၉ ဦးနဲ့ ပျောက်ဆုံးနေသူ ၃၇၃ ဦး ရှိပါတယ်။
စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ငလျင်ကြောင့် ပျက်စီးသွားတဲ့ နေရာတွေအတွက် ပြန်လည်ထူထောင်ရေး ပြုလုပ်ဖို့ ကျပ် ၅၀၀ ဘီလီယံ သုံးစွဲမယ်လို့ မနေ့ ဧပြီ ၁ ရက်မှာ ပြောကြားထားပါတယ်။
