မိုင်းအရှိုင်း၊ ဩဂုတ် ၇ ရက်၊ နမ့်ဆန်
တအာင်းတပ်- PSLF/TNLA ထိန်းချုပ်ထားတဲ့ နမ့်ဆန်၊ မန်တုံနဲ့ နမ္မတူ စတဲ့မြို့ ၃ မြို့မှာ တအာင်းပြည်နယ် လူဝင်မှုကြီးကြပ်ရေးဦးစီးဌာနက ဒေသခံတွေအတွက် မှတ်ပုံတင် (ဒေသခံကတ်ပြား) ပြုလုပ်ပေးတာ ပြီးစီးသွားပြီလို့ တာဝန်ရှိသူတစ်ဦးက ရွှေဖီမြေကို ပြောပါတယ်။
လက်ရှိမှာ အဲဒီမြို့နယ် ၃ မြို့နယ်အတွင်းမှာရှိတဲ့ ကျေးရွာပိုင်းတွေအထိ သွားရောက် ပြုလုပ်ပေးနေတယ်လို့ သူက ပြောပါတယ်။
“အခုက မြို့ပေါ်တွေမှာ ပြီးသွားပြီပေါ့နော်။ နမ္မတူဆို တစ်ရပ်ကွက်ပဲ ကျန်တော့တယ်။ နမ့်ဆန်နဲ့ မန်တုံဆိုရင် ရွာပိုင်းတွေအထိ လိုက်လုပ်ပေးနေတယ်”
မြို့နယ် ၃ မြို့နယ်စလုံး မှတ်ပုံတင် ပြုလုပ်ပြီးစီးရင် PSLF/TNLA ရဲ့ စစ်ဆေးရေးဂိတ်တွေမှာ လူဝင်မှုကြီးကြပ်ရေးလုပ်ငန်း ဆောင်ရွက်သွားမှာဖြစ်ပြီး အဝင်အထွက်တွေကို ကြီးကြပ်သွားမယ်လို့ သူက ဆက်ပြောပါတယ်။
“ဒီမြို့နယ် ၃ မြို့နယ်စလုံး ပြီးသွားပြီဆိုရင် အဝင်အထွက်တွေ စစ်ဆေးဖို့ ရှိတယ်။ ပြည်နယ်သား မှတ်ပုံတင်ကတ်ပြား၊ ပြည်နယ်ဖြတ်သန်းခွင့် ကတ်ပြားတွေကို စစ်ဆေးသွားမယ်”
ထိန်းချုပ်နယ်မြေအားလုံးမှာ မှတ်ပုံတင် မထုတ်ပေးရသေးတာကြောင့် ကြီးကြပ်ရာမှာ PSLF/TNLA ထိန်းချုပ်နယ်မြေအတွင်း နေထိုင်သူ မဟုတ်ဘဲ အခြားဒေသကနေ ဝင်ထွက်နေသူတွေကို အဓိကထားပြီး ကြီးကြပ်သွားမှာ ဖြစ်ပါတယ်။
တအာင်းပြည်နယ် လူဝင်မှုကြီးကြပ်ရေးဦးစီးဌာန (လဝက)- IDTL ဟာ ပြီးခဲ့တဲ့ ဇွန်လပိုင်းကစပြီး နမ့်ဆန်၊ မန်တုံ၊ နမ္မတူ မြို့သုံးမြို့ပေါ်မှာ ဒေသခံတွေအတွက် မှတ်ပုံတင်(ဒေသခံကတ်ပြား) ထုတ်လုပ်ပေးခဲ့တာဖြစ်ပြီး အိမ်ထောင်စု ၇ ထောင်ခန့်၊ မှတ်ပုံတင် ၈ ထောင်ခန့် ပြုလုပ်ပြီးစီးသွားပြီလို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
