ရွှေဖီမြေ၊ ဇန်နဝါရီ ၄ ရက်
တအာင်းတပ်မတော်- PSLF/TNLA ထိန်းချုပ်ထားတဲ့ တအာင်းဒေသ တစ်နေရာမှာ အထွေထွေအုပ်ချုပ်ရေးဌာနက ဦးစီးဖွင့်လှစ်ထားတဲ့ အုပ်ချုပ်ရေး သင်တန်းကျောင်း (Administrative School) အပတ်စဥ်(၂) သင်တန်းဆင်းပွဲကို ကျင်းပခဲ့ပါတယ်။
သင်တန်းဆင်းပွဲကို ပြီးခဲ့တဲ့ ဒီဇင်ဘာ ၃၁ ရက် မနက် ၉ နာရီကနေ နေ့လယ် ၁၂ နာရီအထိ ကျင်းပခဲ့တာလို့ PSLF/TNLA က ဒီနေ့ ဇန်နဝါရီ ၄ ရက်မှာ ထုတ်ပြန်လာပါတယ်။
အုပ်ချုပ်ရေး သင်တန်းကျောင်းဟာ ၂ နှစ်ကျော် ကြာမြင့်ပြီး ဘာသာရပ်တွေကိုတော့ Personal Capacity Building၊ Basic Politic၊ အုပ်ချုပ်ရေးလုပ်ငန်းနဲ့ဆိုင်တဲ့ဘာသာရပ်၊ ရဲလုပ်ငန်းနဲ့သက်ဆိုင်တဲ့ ဘာသာရပ်တွေကို အဓိက သင်ကြားပေးခဲ့တယ်လို့ ဆိုပါတယ်။
သင်တန်းသား ၅၅ ဦး တက်ရောက်ခဲ့တာဖြစ်ပြီး သင်တန်းကျောင်း ပြီးတဲ့သူတွေဟာ အုပ်ချုပ်ရေးနဲ့ တရားဥပဒေစိုးမိုးရေး နေရာတွေမှာ တာဝန်ထမ်းဆောင်သွားမယ်လို့လည်း ဆိုပါတယ်။
သင်တန်းဆင်းပွဲသို့ PSLF/TNLA ရဲ့ ဒုဥက္ကဌ(၁) ဒုဗိုလ်ချူပ်ကြီး တားဂျုတ်ဂျား၊ ဒုဥက္ကဌ(၂) ဗိုလ်ချုပ် တားခူလန်း၊ တွဲဖက် အတွင်းရေးမှူး(၁) ဗိုလ်မှူးချုပ် တားအိုမ်တမာဝ်း၊ ဗိုလ်မှူးချုပ် တားနော်ရူိန်း၊ ဗိုလ်မှူးကြီး တားကုင်ခြီရ်၊ အရာရှိ အရာခံ၊ ရဲဘော်အပြင် ကျောင်းသားမိဘနဲ့ ဒေသခံလူထုအပါအဝင် လူဦးရေ ၂၀၀ နီးပါး တက်ရောက်ခဲ့ပါတယ်။
အုပ်ချုပ်ရေး သင်တန်းကျောင်းကို ပြီးခဲ့တဲ့ ၂၀၁၈ ခုနှစ်မှာ အပတ်စဉ်(၁)အဖြစ် စတင်ဖွင့်လှစ်ပေးခဲ့တာြဖစ်ပြီး အဲဒီတုန်းက သင်တန်းသား ၅၄ ဦး တက်ရောက်သင်ကြားခဲ့တယ်လို့ PSLF/TNLA ရဲ့ ထုတ်ပြန်ချက်အရ သိရပါတယ်။
လက်ရှိ အဲဒီသင်တန်းသားတွေဟာ ရုံးချုပ် ရုံးအုပ်၊ မြို့နယ်အုပ်ချုပ်ရေးမှူး၊ ခရိုင်ရုံးအုပ်၊ မြို့နယ် တရားဥပဒေ စိုးမိုးရေးတပ်ဖွဲ့နဲ့ အထူးတပ်ဖွဲ့မှူးနေရာတွေမှာ တာဝန်ထမ်းဆောင်နေကြပြီလို့ ဖြစ်ပါတယ်။
