မိုင်းရူပ၊ အောက်တိုဘာ ၃၁ ရက်၊ မိုးကုတ်
စစ်ကောင်စီကို ပြန်လည်လွှဲပြောင်းပေးရမယ့် မန္တလေးတိုင်း မိုးကုတ်မြို့မှာ တအာင်းတပ်မတော်–PSLF/TNLA ရဲ့ အုပ်ချုပ်ရေးအဖွဲ့တွေ ဆက်ရှိနေပြီး ဒေသခံတချို့ တိမ်းရှောင်နေကြတယ်လို့ မြို့ခံတွေက ရွှေဖီမြေ ကို ပြောပါတယ်။
“ကြောက်တဲ့သူတွေတော့ ရှောင်ကြတာရှိတယ်။ TNLA ဘက်ကတော့ မဆုတ်သေးဘူး။ ရဲလည်း သူအလုပ်သူလုပ်နေတုန်း။ အုပ်ချုပ်ရေးလုပ်ငန်းတွေက ပုံမှန်လည်ပတ်နေသေးတယ်” လို့ မိုးကုတ်ဒေသခံတစ်ဦးက ရွှေဖီမြေ ကို ပြောပါတယ်။
မိုးကုတ်မြို့ကို စစ်ကောင်စီထံ TNLA က ပြန်ပေးခဲ့မယ့် မိုးကုတ်အခြေစိုက် တော်လှန်ရေးတပ်တွေက ခုခံကာကွယ်မယ်လို့ ပြောထားတာကြောင့် မိုးကုတ်မြို့ကို ကာကွယ်ဖို့ TNLA နဲ့ စစ်ကောင်စီအကြား သဘောတူညီချက်အပေါ် မူတည်နေတယ်လို့ မိုးကုတ်အခြေစိုက် တော်လှန်ရေးတပ်ဖွဲ့ဝင်တစ်ဦးက ပြောပါတယ်။
“အဓိက TNLA အပေါ်မှာ မူတည်တယ်ပေါ့။ သူတို့ ဒီအတိုင်း ဆုတ်မှာလား။ အဲလိုမဟုတ်ဘဲနဲ့ စကစကို မြို့ထဲရောက်ဖို့ ကူညီပေးမှာလား။ အဲတာ TNLA ရွေးချယ်ရမယ့်အပိုင်းဘဲ။ တော်လှန်ရေးအင်အားစုတွေကတော့ ရနိုင်သလောက် ကာကွယ်မှာဘဲ”
မိုးကုတ်နဲ့ မိုးမိတ်မြို့နယ်ကနေ လာမယ့် နိုဝင်ဘာလကုန်မှာ တအာင်းတပ်ဘက်က ဆုတ်ပေးရမှာဖြစ်တယ်လို့ ရွှေဖီမြေ က စုံစမ်းသိရှိရပါတယ်။
မိုးကုတ်အခြေစိုက် တော်လှန်ရေးတပ်တွေဖြစ်တဲ့ မန္တလေး PDF၊ မိုးကုတ်ဗျူဟာအပါအဝင် မိုးကုတ်အခြေစိုက် တော်လှန်ရေးတပ်တွေက မိုးကုတ်မြို့ကို စစ်ကောင်စီလက်အောက်မရောက်အောင် ခုခံကာကွယ်သွားမယ်လို့ ထုတ်ပြန်ထားကြပါတယ်။
PSLF/TNLA ရဲ့ ပြောရေးဆိုခွင့်ရှိသူ လွေးယေဦးကတော့ လူထုတွေအတွက် အသက်သာဆုံးဖြစ်မယ့် အပစ်ရပ်ဖို့ကို ခက်ခက်ခဲခဲဆုံးဖြတ်ခဲ့ရပြီး မိုးကုတ်နဲ့ မိုးမိတ်မြို့ကို စစ်ကောင်စီကို ပြန်ပေးဖို့ သဘောတူခဲ့ရတာလို့ ဒေသတွင်းမီဒီယာတွေမှာ ဖြေကြားထားပါတယ်။
တရုတ်ရဲ့ ကြားဝင်စေ့စပ်မှုနဲ့ PSLF/TNLA နဲ့ စစ်ကောင်စီတို့အကြား ပြီးခဲ့တဲ့ အောက်တိုဘာ ၂၉ ရက်က စပြီး အပစ်ခတ်ရပ်စဲဖို့ သဘောတူပြီးနောက် တအာင်းတပ်ဘက်က မိုးကုတ်နဲ့ မိုးမိတ်မြို့တွေကို စစ်ကောင်စီထံ ပြန်လည်လွှဲပြောင်းဖို့ သဘောတူခဲ့ရပါတယ်။
မိုးကုတ်နဲ့ မိုးမိတ်မြို့ဟာ ပြီးခဲ့တဲ့ “၁၀၂၇ စစ်ဆင်ရေး ဒုတိယလှိုင်း” အတွင်း TNLA ပူးပေါင်းတပ်တွေက တိုက်ခိုက်သိမ်းနိုင်ခဲ့တာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
