အိုက်ပွီး၊ အောက်တိုဘာ ၁၅ ရက်၊ ဖလမ်း
ချင်းပြည်နယ် ဖလမ်းမြို့နယ်မှာ ချင်းတော်လှန်ရေးအချင်းချင်း ဖြစ်ပွားတဲ့ တိုက်ပွဲအတွင်း အိန္ဒိယဘက် ထွက်ပြေးလွတ်မြောက်သွားတဲ့ စစ်သုံ့ပန်းတွေကို အိန္ဒိယစစ်တပ်က စစ်ကောင်စီထံ ပြန်လွှဲပြောင်းပေးခဲ့တယ်လို့ ချင်းစစ်ရေးသတင်းအရင်းမြစ်ဆီက သိရပါတယ်။
အိန္ဒိယနိုင်ငံဘက် ထွက်ပြေးလွတ်မြောက်သွားတဲ့ စစ်သုံ့ပန်းတွေဟာ စစ်ကောင်စီတပ်နဲ့ အဆက်အသွယ်ပြန်ရပြီး အိန္ဒိယနိုင်ငံ မြန်မာသံရုံးမှတဆင့် အိန္ဒိယအစိုးရရဲ့ အစီအစဥ်ဖြင့် စစ်ကောင်စီထံ ဒီနေ့ အောက်တိုဘာလ ၁၄ ရက်နေ့မနက်မှာ ပြန်လွှဲပြောင်းပေးတာပါ။
“ဒီနေ့မနက် ၁၀ နာရီလောက်မှာ အိန္ဒိယ-မြန်မာနယ်စပ် မိုးရေ-တမူးဘက်က ပြန်လွဲပြောင်းပေးလိုက်တာပါ။ ဖလမ်းမြို့သိမ်းတိုက်ပွဲတုန်းက ဖမ်းဆီးထိန်းသိမ်းထားတဲ့ စစ်သုံ့ပန်းတွေပါ။ စစ်သားနဲ့ ရဲတပ်ဖွဲ့ဝင်တွေ စုစုပေါင်း ၂၁ ယောက်ပါ။”လို့ ချင်းစစ်ရေးသတင်းအရင်းမြစ်က ရွှေဖီမြေသို့ ပြောပါတယ်။
အဲဒီစစ်သုံ့ပန်းတွေဟာ ပြီးခဲ့တဲ့ ဇူလိုင်လတုန်းက ဖလမ်းမြို့နယ်ထဲရှိ ချင်းအမျိုးသားကာကွယ်ရေးတပ် – CNDF ဌာနချုပ်ကို ချင်းကာကွယ်ရေးတပ်-ဟွာငိုရမ် ပူးပေါင်းတပ်တွေ တိုက်ခိုက်သိမ်းပိုက်စဥ် အိန္ဒိယနိုင်ငံဘက် ထွက်ပြေးတဲ့ စစ်ကောင်စီတပ်ဖွဲ့ဝင်တွေပါ။
“ပြီးခဲ့တဲ့ ဇူလိုင်လဆန်းက CDF ဟွာငိုရမ် ထိန်းချုပ်ထားတဲ့ ရိဒ်ခေါဒါရ်မြို့ကို CNDF က သိမ်းပိုက်ထားတုန်းက CDF- ဟွာငိုရမ် ကလည်း CNDF ဌာနချုပ်ကို ပြန်တိုက်တယ်။ CNDF ဌာနချုပ်တိုက်တုန်းက တိုက်ပွဲမှာ စစ်သုံ့ပန်းတွေက အိန္ဒိယဘက်ကို ထွက်ပြေးလွတ်မြောက်သွားတဲ့ သဘောပါ။” လို့ ချင်းစစ်ရေးသတင်းအရင်းမြစ်က ရွှေဖီမြေသို့ ပြောပါတယ်။
အိန္ဒိယဘက် ထွက်ပြေးလွတ်မြောက်သွားတဲ့ စစ်သုံ့ပန်းတွေဟာ မီဇိုရမ်ပြည်နယ်၊ ကျန်ဖိုင်မြို့၊ Saikhumphai ကျေးရွာမှာ အိန္ဒိယစစ်တပ်ဆီ ဖမ်းဆီးထိန်းသိမ်းပြီးနောက် စစ်ကောင်စီထံ ပြန်လွှဲပြောင်းပေးခဲ့တာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
