မိုင်းရူပ၊ ဧပြီ ၂၃ ရက်၊ မောက်မယ်
အပစ်ရပ်ထားတဲ့ စစ်ကောင်စီတပ်ဟာ ရှမ်းတောင် မောက်မယ်မြို့နယ်ထဲမှာရှိတဲ့ ပအိုဝ်းတပ်မတော်- PNLO/PNLA ရဲ့ ဌာနချုပ်ဧရိယာကို လက်နက်ကြီးနဲ့ ပစ်ခတ်တိုက်ခိုက်ခဲ့တာကြောင့် စစ်တပ်ဟာ ငြိမ်ချမ်းမှုကို မလိုလားကြောင်း PNLO က ပြောပါတယ်။
မနေ့ ဧပြီ ၂၂ ရက် မနက် ၈ နာရီကနေ ၁၁ နာရီအထိ မောက်မယ်မြို့နယ်ထဲမှာရှိတဲ့ နောင်ထောင်ရွာနဲ့ PNLO ရဲ့ ဌာနချုပ်ကို တိုက်ပွဲ ဖြစ်ပွားတာ မရှိဘဲ လက်နက်ကြီးနဲ့ ၁၀ ကြိမ်ထက်မနည်း ပစ်ခတ်တိုက်ခိုက်ခဲ့တယ်လို့ ဆိုပါတယ်။
စစ်တပ်ဟာ ယာယီ အပစ်ရပ်ကြောင်း ထုတ်ပြန်ထားပေမဲ့ ငြိမ်းချမ်းမှုကို လိုလားကြောင်း မတွေ့ရဘူးလို့ PNLO ရဲ့ ပြောရေးဆိုခွင့်ရှိသူ ခွန်ရိန်းယံက ရွှေဖီမြေကို ပြောပါတယ်။
“စစ်ကောင်စီက အပစ်ရပ်သက်တမ်း တိုးတဲ့နေ့မှာဘဲ ကျနော်တို့ရဲ့ ဌာနချုပ်ဧရိယာမှာရှိတဲ့ ကျေးရွာတွေကို ၈၁ မမတွေ၊ ဟောင်ဝစ်ဇာ လက်နက်ကြီးတွေ အသုံးပြုပြီး ၁၀ ကြိမ်ထက်မနည်း ပစ်ခတ်တိုက်ခိုက်ခဲ့တယ်။ ဒါကို ကြည့်ခြင်းအားဖြင့် စစ်ကောင်စီက ငြိမ်းချမ်းမှု၊ တည်ငြိမ်မှုကို တစ်ကယ်လိုလားတာ မဟုတ်ဘူးဆိုတာ တွေ့နေရတယ်”
စစ်တပ်ရဲ့ လက်နက်ကြီးကြောင့် PNLO ဌာနချုပ်ဧရိယာအနီးမှာရှိတဲ့ နေအိမ်တချို့ ထိခိုက်ပျက်စီးခဲ့တယ်လို့ ခွန်ရိန်းယံက ဆက်ပြောပါတယ်။
PNLO ရဲ့ ဌာနချုပ်ကို လက်နက်ကြီး ပစ်ခတ်တိုက်ခိုက်ခဲ့တာနဲ့ ပတ်သက်ပြီး စစ်တပ်ဘက် တစ်စုံတစ်ရာ တုန့်ပြန်ထားတာ မရှိသေးပါဘူး။
မနေ့ဟာ စစ်ကောင်စီရဲ့ ၃ ပတ်ကြာ အပစ်ရပ်သက်တမ်း ပြည့်တဲ့နေဖြစ်ပြီး ဧပြီ ၃၀ ရက်အထိ သက်တမ်း ထပ်တိုးလိုက်ကြောင်း စစ်ကောင်စီက မနေ့မှာ ထုတ်ပြန်လာပါတယ်။
စစ်တပ်ဟာ အပစ်ရပ်မယ်လို့ ကြေညာထားပေမဲ့ တော်လှန်ရေးတပ်တွေ ထိန်းချုပ်ထားတဲ့ ဒေသတွေကို လေကြောင်းနဲ့တိုက်ခိုက်တာ ထိုးစစ်ဆင်တာတွေ ဆက်တိုက် လုပ်ဆောင်နေပါတယ်။
