လွေးဇွန်မိုး၊ ဇန်နဝါရီ ၂၅ ရက်၊ ဆီဆိုင်
ရှမ်းတောင် ဆီဆိုင်မြို့ အရှေ့ဘက်ခြမ်းတိုက်ပွဲအတွင်း စစ်ကောင်စီတပ်က အဆိပ်ပါတဲ့ လက်နက်ကြီး အသုံးပြုပြီး တိုက်ခိုက်နေတယ်လို့ ပအိုဝ်းတပ်မတော်- PNLO/PNLA က ဒီနေ့ ဇန်နဝါရီ ၂၅ ရက်မှာ ထုတ်ပြန်လာပါတယ်။
မနေ့ ဇန်နဝါရီ ၂၄ ရက်မှာ စစ်တပ်ရဲ့ ပစ်ခတ်မှုကြောင့် မပေါက်ကွဲသေးတဲ့ လက်နက်ကြီးတစ်လုံးကို PNLA က တူးဖော်ရရှိခဲ့ပြီး အဲဒီလက်နက်ကြီးပေါ်မှာ အဆိပ်လို့ ရေးသားထားသလို အဆိပ်ထွက်ပေါက်လည်း ပါဝင်တယ်လို့ ဆိုပါတယ်။
စစ်တပ် ပစ်ခတ်ခဲ့တဲ့ အဆိပ်ငွေ့ ရှူမိတာကြောင့် PNLA ရဲ့ တပ်သားတချို့ အရေပြား ယားယံတာ၊ အပြင်းအထန် ဖျားနာတာနဲ့ မူးဝေအော့အန်တာတွေ ခံစားခဲ့ရတာ ရှိတယ်လို့ PNLA ရဲ့ ပြောရေးဆိုခွင့်ရှိသူ ခွန်ရိန်းယံက ပြောပါတယ်။
“သူတို့ အဆိပ်သုံးလာတာကတော့ အလုံးပေါင်းများစွာ ရှိပါတယ်။ ဒါက မကွဲလို့ ကျနော်တို့ တူးဖော်ရရှိတဲ့တစ်လုံးပါ။ အဲဒီအဆိပ်ငွေ့တွေ ရှူမိလို့ အပြင်းအထန် ဖျားနာတာတွေ၊ အရေပြား ယားယံတာ စတဲ့လက္ခဏာတွေ ခံစားရတဲ့ ရဲဘော်တွေလည်း ရှိပါတယ်”
စစ်တပ်နဲ့ PNO က အင်အား ၇၀၀ ကျော်နဲ့ ထိုးစစ်ဆင် တိုက်ခိုက်နေတာကြောင့် ဆီဆိုင်မြို့နယ်မှာ နေ့စဥ် တိုက်ပွဲ ပြင်းထန်နေပြီး တိုက်ပွဲအတွင်း စစ်ကောင်စီတပ်သား ၂၀၀ ထက်မနည်း သေဆုံးခဲ့တယ်လို့ ဖော်ပြထားပါတယ်။
စစ်တပ်က လက်နက်ကြီး၊ ဒရုန်း၊ မီးလောင်ဗုံးနဲ့ လေကြောင်း တိုက်ခိုက်မှုကြောင့် ဒေသခံ ၄ ထောင်ကျော် တောတောင်ထဲ ထွက်ပြေးတိမ်းရှောင်နေရပြီး ထီစုံကျေးရွာက လူနေအိမ် ၆၀ ကျော် ထိခိုက်ပျက်စီးခဲ့တယ်လို့ ဖော်ပြထားပါတယ်။
