မိုင်းရူပ၊ မတ်လ ၁၄ ရက်
မနေ့ မတ်လ ၁၃ ရက်မှာ ကျရောက်တဲ့ ၇၆ ကြိမ်မြောက် ပအိုဝ်းအမျိုးသားနေ့မှာ ပအိုဝ်းပြည်နယ်သစ် ပေါ်ထွန်ရေး လိုလားကြောင်း ပအိုဝ်းအမျိုးသား ဖက်ဒရယ်ကောင်စီ- PNFC ရဲ့ ဥက္ကဌ ဦးခွန်မြင့်ထွန်းက ပြောကြားခဲ့ပါတယ်။
ပအိုဝ်းအမျိုးသား လွတ်မြောက်ရေးအဖွဲ့ချုပ်- PNLO နဲ့ PNFC ပူးတွဲကျင်းပတဲ့ ပအိုဝ်းအမျိုးသားနေ့မှာ PNFC ရဲ့ ဥက္ကဌ ဦးခွန်မြင့်ထွန်းက ပြောကြားခဲ့တာ ဖြစ်ပါတယ်။
“ပအိုဝ်းတွေဟာ ပြည်ထောင်စုကို ငဲ့ခဲ့ပါတယ်။ ကျနော်တို့ကြောင့်ဆိုတာမျိုး အဖြစ်မခံချင်ခဲ့တဲ့အတွက် ပအိုဝ်းပြည်နယ်ကိစ္စကို ရင်ထဲက ရှိသော်လည်း ထုတ်မပြောခဲ့ဘူး။ ဒီကနေ့ တတိယ တော်လှန်ရေးမှာ ကျနော်တို့ ပွင့်ပွင့်လင်းလင်း ပြောပါတယ်။ ပအိုဝ်း ပြည်နယ်သစ် ပေါ်ထွန်းရေးကို ကျနော်တို့ လိုလားတယ်” လို့ ဥက္ကဌ ဦးခွန်မြင့်ထွန်းက ပြောဆိုခဲ့ပါတယ်။
ပအိုဝ်းပြည်နယ်သစ် ပေါ်ထွန်ရေးအတွက် နိုင်ငံရေးနည်းလမ်းနဲ့ ရယူသွားမယ်လို့ ဦးခွန်မြင့်ထွန်းက ပအိုဝ်းအမျိုးသားနေ့ အခမ်းအနားမှာ ထည့်သွင်းပြောကြားခဲ့ပါတယ်။
ဒါ့အပြင် ပအိုဝ်းအမျိုးသားနေ့အတွက် PNFC နဲ့ PNLO ရဲ့ ပူးတွဲကြေညာချက်ထဲ ပအိုဝ်းအမျိုးသား အင်အားစုတွေအကြား စစ်ကောင်စီရဲ့ သွေးခွဲတာ ခံနေရပြီး စစ်အာဏာရှင်စနစ် သက်ဆိုးစေရှည်ဖို့ ပအိုဝ်းပြည်သူတွေ လူသားဒိုင်းအဖြစ် အသုံးချခံနေရတယ်လို့ ဖော်ပြထားပါတယ်။
လက်ရှိမှာ စစ်ကောင်စီနဲ့ ပူးပေါင်းနေတဲ့ ပအိုဝ်း ပြည်သူ့စစ်အဖွဲ့- PNO ကိုလည်း တော်လှန်ရေးအဖွဲ့နဲ့ ပူးပေါင်းဖို့လည်း တိုက်တွန်းထားပါတယ်။
မနေ့ အွန်လိုင်းမှာ ကျင်းပတဲ့ ပအိုဝ်းအမျိုးသားနေ့မှာ အမျိုးသား ညီညွတ်ရေးအစိုးရ- NUG၊ ကရင်အမျိုးသား အစည်းအရုံး- KNU အပါအဝင် တော်လှန်ရေးအင်အားစုရဲ့ ထိပ်ပိုင်းခေါင်းဆောင်နဲ့ အရပ်ဖက်အဖွဲ့အစည်းတွေ တက်ရောက်ခဲ့ပါတယ်။
