ရွှေဖီမြေ၊ ဩဂုတ် ၂၀ ရက်၊ မော်လိုက်
စစ်ကိုင်းတိုင်း မော်လိုက်မြို့နယ် ထော်သာရွာ (ပျူစောထီး)စခန်းကို ပြီးခဲ့တဲ့ ဩဂုတ် ၁၅ ရက်မှာ မော်လိုက်ခရိုင် တပ်ရင်း ၂၊ ၄ နဲ့ ဖောင်းပြင်မြို့နယ် ပကဖ ပူးပေါင်းအဖွဲ့က တိုက်ခိုက်သိမ်းပိုက်ခဲ့တယ်လို့ အမှတ်(၁) စစ်ဒေသက ဒီနေ့ ဩဂုတ် ၂၀ ရက်မှာ ထုတ်ပြန်လာပါတယ်။
အဲဒီစခန်းကို သိမ်းပိုက်ရရှိချိန်မှာ စစ်တပ်ဘက်က ၃ ဦး သေဆုံးပြီး ၉ ဦး ဒဏ်ရာ ရခဲ့တဲ့အပြင် ၆၀ မမပြောင်းနဲ့ RPG အပါအဝင် လက်နက် ၂၃ လက်၊ ခဲယမ်းတချို့နဲ့ ငွေ သိန်း ၁၅၀ ကျော်ကိုလည်း သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ပျူစောထီးခေါင်းဆောင် အဲပန်အပါအဝင် ပျူစောထီးအဖွဲ့ဝင်ရဲ့ မိသားစုဝင် ၁၉၀ ဦးကို ဖမ်းဆီးရမိခဲ့ပြီး ပျူစောထီးအဖွဲ့ဝင် ၂၀ ကျော် ထွက်ပြေးလွတ်မြောက်ခဲ့တယ်လို့ ဆိုပါတယ်။
တိုက်ပွဲအတွင်း တံတားဦး လေတပ်စခန်းကနေ တက်လာတဲ့ Yak-130 လေယာဉ်တစ်စီးနဲ့ ဗုံး ၁ လုံး ကြဲချတိုက်ခိုက်ခဲ့ပြီး စစ်ရေယာဉ်ပေါ်ကနေလည်း ဒရုန်းနဲ့ ဗုံးကြဲတိုက်ခိုက်ခဲ့တယ်လို့ ဖော်ပြထားပါတယ်။
စခန်းကို သိမ်းပိုက်နေစဉ်အတွင်း ချင်းတွင်းမြစ်အတိုင်း စစ်ကူလာတဲ့ စစ်ကောင်စီ တပ်ဖွဲ့ဝင် ၁၃၀ နဲ့ တောင်းအင်ရွာကနေ အင်အား ၅၀ ထိုးစစ်ဆင် တိုက်ခိုက်ခဲ့ပေမဲ့ ပူးပေါင်းတပ်ဘက်က ထော်သာရွာစခန်းကို အောင်မြင်စွာ သိမ်းပိုက်နိုင်ခဲ့တယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
