ခိုင်လေး၊ ဧပြီ ၂၃ ရက်၊ မင်းလှ
ပဲခူးတိုင်း မင်းလှမြို့နယ် အင်ကြင်းကုန်းအုပ်စု အညာတန်းကြီးရွာ ရန်ကုန်-ပြည် ကားလမ်းဘေးရှိ “53”မြန်မာထမင်းဆိုင်မှာ စကစနဲ့ ပျူစောထီး ၂၀ ဦးခန့်ကို သာယာဝတီခရိုင် တပ်ရင်း(၃၈၀၂) တပ်ခွဲ ၂ ရဲဘော်တွေက ရှောင်တခင် ပစ်ခတ်တိုက်ခိုက်ခဲ့တယ်လို့ သာယာဝတီခရိုင်(၃၈၀၂)မှ တာဝန်ရှိသူတစ်ဦးက ရွှေဖီမြေကို ပြောပါတယ်။
မနေ့ ဧပြီ ၂၂ ရက် မနက် ၁၀ နာရီခွဲက “53”မြန်မာထမင်းဆိုင်မှာ ထမင်းစားနေတဲ့ စကစနဲ့ ပျူစောထီးကို သာယာဝတီခရိုင် PDF က လိုက်လံ ပစ်ခတ်တိုက်ခိုက်ခဲ့ရာ စကစနဲ့ ပျူစောထီး ၈ ဦး သေဆုံးပြီး ၄ ဦး ဒဏ်ရာ ရခဲ့ပါတယ်။
”သတင်းရလို့သွားတာ။ သူတို့ဘက်က ပြန်ခုခံဖို့ အချိန်မရလိုက်ဘူး။ ကျနော်တို့ဘက်က တရစပ် ပစ်ခတ်တာ။ ဆိုင်ထဲမှာ ပြည်သူတွေ ရှိနေလို့ ဆိုင်ထဲက စကစတွေကိုမပစ်ဘဲ ဆိုင်ပြင်က စောင့်ကြည့်ပေးတဲ့ ပျူ ၂ ကောင်ကို အရင်ပစ်တာ။ သူတို့ပစ်ခံရတာမြင်ပြီး စကစနဲ့ပျူတွေ ထွက်ပြေးမှ လိုက်ပစ်တာ” လို့ သာယာဝတီခရိုင် (၃၈၀၂)မှ တာဝန်ရှိသူတစ်ဦးက ပြောပါတယ်။
ရန်ကုန်-ပြည်ကားလမ်း အရှေ့ဘက်မှာရှိတဲ့ ကျေးရွာက လူငယ်တွေကို ပေါ်တာဆွဲ ဖမ်းဆီးဖို့ စစ်တပ် လာရောက်မယ်ဆိုတဲ့သတင်းကြောင့် သာယာဝတီခရိုင် တပ်ရင်း(၃၈၀၂) တပ်ခွဲ ၂ နဲ့ ၃ မှ ရဲဘော်တွေ နှစ်ဖွဲ့ခွဲပြီး နယ်မြေရှင်းလင်းရေး လုပ်ခဲ့တာလို့ ဆိုပါတယ်။
စစ်တပ်ဘက်က အထိနာတာကြောင့် မနေ့ နေ့လယ် ၂ နာရီ ၁၅ မိနစ်ခန့်က Mi-35 ရဟတ်ယာဉ်နဲ့ ရိုးမအစပ်ရှိ ဒေသခံတွေ နေထိုင်တဲ့နေရာကို ဗုံးကြဲတိုက်ခိုက်ခဲ့တယ်လို့ ၎င်းက ဆက်ပြောပါတယ်။
”ဗုံး ၃ လုံးစီ ၃ ကြိမ် ၉ လုံး ကြဲတယ်။ လူအထိအခိုက် အဲမှာတော့ မကြားဘူး။ ကျောက်တံခါး တောရဘုန်းကြီးကျောင်းက နတ်နန်းတစ်ခု ပျက်စီးသွားတယ်။ အဲဘုန်းကြီးကျောင်းအပြင်က အင်တိုင်းတော ကျောက်တောင်မှာ ကား ၁ စီး လေယာဉ်နဲ့ပစ်တာ ထိသွားတယ်။ အဲကားထဲက ပြည်သူတစ်ယောက် ပြင်းထန်ဒဏ်ရာရတာ သေသွားလား မသေဘူးလားတော့ မသိရသေးဘူး”
ထိတွေ့တိုက်ပွဲ ဆက်လက် ဖြစ်ပွားလာနိုင်တာကြောင့် ဒေသခံတွေအနေနဲ့ စစ်တပ်အနီး သွားလာနေထိုင်တာ လုံးဝ မပြုလုပ်ကြဖို့နဲ့ လေကြောင်း တိုက်ခိုက်မှု လုပ်ဆောင်လာနိုင်တာကြောင့် သတိနဲ့ နေထိုင်ကြဖို့ အသိပေးတိုက်တွန်းလိုတယ်လို့ ဆိုပါတယ်။
