ရွှေဖီမြေ၊ မတ်လ ၉ ရက်
တအာင်းတပ်မတော်-PSLF/TNLA ထိန်းချုပ်နယ်မြေမှာ ၁ လအတွင်း မူးယစ်ဆေးဝါးသုံးစွဲသူနဲ့ ရောင်းဝယ်သူ ၉၀ ကျော်ကို ဖမ်းဆီးနိုင်ခဲ့တယ်လို့ တအာင်းတပ်က မနေ့ မတ်လ ၈ ရက်မှာ ထုတ်ပြန်ထားပါတယ်။
TNLA ထိန်းချုပ်ထားတဲ့ နမ့်ခမ်း၊ မိုးကုတ်၊ ကွတ်ခိုင်၊ ကျောက်မဲ၊ နမ့်ဆန်နဲ့ လားရှိုးမြို့နယ် မိုင်းယော်တိုက်နယ်မှာ ပြီးခဲ့တဲ့ ဖေဖော်ဝါရီလအတွင်း မူးယစ်ဆေးဝါးသုံးစွဲသူ (၈၅)ဦးနဲ့ ရောင်းဝယ်သူ (၇)ဦးကို ဖမ်းဆီးနိုင်ခဲ့တယ်လို့ ဆိုပါတယ်။
ဖမ်းဆီးရမိတဲ့ မူးယစ်ဆေးဝါးသုံးစွဲသူတွေထဲမှ နမ့်ခမ်းမှာ သုံးစွဲသူ ၂၇ ဦးနဲ့ ရောင်းဝယ်သူ ၅ ဦး၊ မိုးကုတ်မှာ သုံးစွဲသူ ၂ ဦး၊ ကွတ်ခိုင်မှာ သုံးစွဲသူ ၇ ဦး၊ ကျောက်မဲမှာ သုံးစွဲသူ ၁၇ ဦးနဲ့ရောင်းဝယ်သူ ၁ ဦး၊ နမ့်ဆန်မှာ သုံးစွဲသူ ၂၃ ဦးနဲ့ မိုင်းယော်မှာ သုံးစွဲသူ ၉ ဦးနဲ့ ရောင်းဝယ်သူ ၁ ဦးဖြစ်ပါတယ်။
ဖမ်းဆီးရမိတဲ့သူတွေကို အကျင့်စာရိတ္တပြုပြင်ရေးစခန်းမှာ ပို့ဆောင်သွားမှာဖြစ်ပြီး ပစ်မှုကြီးတဲ့သူတွေကိုတော့ အကျဥ်းထောင်အတွင်း ထိန်းသိမ်းသွားမယ်လို့ ဆိုပါတယ်။
ပြီးခဲ့တဲ့ ၂၀၂၄ ခုနှစ်အတွင်း -PSLF/TNLA ထိန်းချုပ်ထားတဲ့ဒေသတွေမှာ မူးယစ်ဆေးဝါးသုံးစွဲသူ ၁၉၂၃ ဦးကို ဖမ်းဆီးနိုင်ခဲ့တယ်လို့ TNLA က ပြီးခဲ့တဲ့ ဇန်နဝါရီ ၂၈ ရက်မှာ သတင်းထုတ်ပြန်ထားပါတယ်။
