ရွှေဖီမြေ၊ ဖေဖော်ဝါရီ ၁ ရက်
စစ်တပ် အာဏာ စသိမ်းတဲ့ ၂၀၂၁ ခုနှစ် ဖေဖော်ဝါရီ ၁ ရက်ကနေ မနေ့ ၂၀၂၅ ခုနှစ် ဇန်နဝါရီ ၃၁ ရက်အထိ ၄ နှစ်အတွင်း စစ်ကောင်စီတပ်နဲ့ ၎င်းရဲ့ လက်အောက်ခံတွေကြောင့် နိုင်ငံတစ်ဝှမ်းက အရပ်သား ၆,၂၃၉ ဦး သေဆုံးခဲ့တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း- AAPP က ဒီနေ့ ဖေဖော်ဝါရီ ၁ ရက်မှာ ထုတ်ပြန်ထားပါတယ်။
သေဆုံးသွားသူ ၆ ထောင်ကျော်ထဲ ကလေး ၇၁၄ ဦးနဲ့ အမျိုးသမီး ၁ ထောင့်သုံးရာကျော် (၁,၃၉၇ ဦး)ပါဝင်တယ်လို့ ဆိုပါတယ်။
ဒါ့အပြင် ၂၀၂၅ ခုနှစ် ဇန်နဝါရီ ၁ ရက်ကနေ မနေ့ ဇန်နဝါရီ ၃၁ ရက်အထိ တစ်လအတွင်း စစ်တပ်ကြောင့် အမျိုးသမီး ၅၄ ဦးနဲ့ အမျိုးသား ၅၉ ဦး စုစုပေါင်း သေဆုံးသူ ၁၁၃ ဦးကို နာမည်နဲ့တကွ အတည်ပြုနိုင်ခဲ့ပြီး အဲဒီအထဲမှာ အသက် ၁၈ နှစ်အောက်ကလေး ၁၉ ဦး ပါဝင်တယ်လို့ ဆိုပါတယ်။
သေဆုံးသူ အများစုဟာ လေကြောင်းတိုက်ခိုက်မှုကြောင့်ဖြစ်ပြီး ရခိုင်ပြည်နယ်မှာ ၃၅ ဦးနဲ့ သေဆုံးမှု အများဆုံးနဲ့ ကချင်ပြည်နယ်မှာ ၁၈ ဦး ဒုတိယအများဆုံးဖြစ်တယ်လို့ AAPP ရဲ့ ထုတ်ပြန်ချက်အရ သိရပါတယ်။
၄ နှစ်အတွင်း နိုင်ငံတစ်ဝှမ်းက ဒီမိုကရေစီအရေး လှုပ်ရှားသူပေါင်း ၂ သောင်း ၈ ထောင်ကျော်(၂၈,၄၄၄ ဦး) ဖမ်းဆီးခံခဲ့ရပြီး အဲဒီအထဲက ၂ သောင်း ၂ ထောင်ဝန်းကျင် (၂၁,၇၂၂ ဦး)ဟာ ထိန်းသိမ်းခံနေရဆဲ ဖြစ်ပါတယ်။
ထိန်းသိမ်းခံနေရသူတွေထဲက ၁ သောင်းကျော် (၁၀,၂၀၉ ဦး)ဟာ ထောင်ဒဏ်အသီးသီး ချမှတ်ခံထားရတယ်လို့လည်း ဖော်ပြထားပါတယ်။
