မိုင်းရူပ၊ ဧပြီ ၂၈ ရက်၊ ဟိုပုံး
ရှမ်းတောင် ပအိုဝ်းဒေသ ဟိုပုံးမြို့နယ်ရှိ ကျေးရွာ ၃ ခုမှာ မိုးသက်လေပြင်းကြောင့် နေအိမ် ၅၀ ကျော် ပျက်စီးခဲ့ပြီး အကူအညီ လိုအပ်နေတယ်လို့ ဒေသခံတွေက ရွှေဖီမြေကို ပြောပါတယ်။
မနေ့ ဧပြီ ၂၇ ရက် နေ့လယ် ၂ နာရီဝန်းကျင်မှာ မိုးကြီးပြီး လေပြင်း တိုက်ခတ်တာကြောင့် ဟိုပုံးမြို့နယ်ရှိ နောင်ဒေ၊ ပါမိုက်၊ နမ့်ခလောက် စတဲ့ကျေးရွာ ၃ ရွာက ဘုန်းကြီးကျောင်းနဲ့ စာသင်ကျောင်းအပါအဝင် နေအိမ်အမိုးတွေ ပျက်စီးသွားတယ်လို့ ဆိုပါတယ်။
“မိုးလည်း ရွာ၊ လေလည်း တိုက်တယ်။ သစ်ပင်ကြီးတောင်မှ အမြစ်ပါမကျန် လှန်ထွက်ကုန်တာ။ အိမ်ခေါင်မိုးတွေလည်း အကုန် လှန်ထွက်ကုန်တာ” လို့ နောင်ဒေရွာခံတစ်ဦးက ရွှေဖီမြေကို ပြောပါတယ်။
နေအိမ် ပျက်စီးသွားတဲ့သူတွေကို လက်ရှိအချိန်ထိ လာရောက် ကူညီပေးသူ မရှိသေးဘဲ အကူအညီ လိုအပ်နေတယ်လို့ သူက ဆက်ပြောပါတယ်။
ဒီနေ့ ဧပြီ ၂၈ ရက်ကနေ မေလ ၃ ရက်အထိ တစ်နိုင်ငံလုံးမှာ အချိန်အခါမဟုတ် မိုးရွာနိုင်ပြီး တချို့ဒေသမှာ မိုးကြီးနိုင်တယ်လို့ စစ်ကောင်စီရဲ့ မိုးလေဝသနဲ့ ဇလဗေဒ ညွှန်ကြားမှုဦးစီးဌာနက မနေ့ ဧပြီ ၂၇ ရက်မှာ ထုတ်ပြန်ထားပါတယ်။
