ခိုင်လေး၊ မတ်လ ၃ ရက်၊ သီပေါ
လက်ရှိ တအာင်းတပ်မတော် TNLA ထိန်းချုပ်ထားတဲ့ ရှမ်းမြောက် သီပေါမြို့က မိဘမဲ့ဂေဟာတွေမှာရှိတဲ့ ကလေးသူငယ်တွေရဲ့ စားဝတ်နေရေးအတွက် အကူအညီတွေ လိုအပ်နေတယ်လို့ နှလုံးသားပရဟိတ အဖွဲ့ခေါင်းဆောင်ဖြစ်တဲ့ နေဇော်ထွန်းက ရွှေဖီမြေကို ပြောပါတယ်။
မိဘမဲ့ဂေဟာဖြစ်တဲ့ “ရင်ခွင်မဲ့သူများ” ဂေဟာမှာ ကလေးအယောက် (၂၀) နီးပါး၊ “ဆုတောင်းရာအိမ်”မှာ ကလေးငယ်အယောက် (၅၀)၊ “လီဆူပညာရေးဂေဟာ”မှာ အယောက် (၅၀) ကျော်ရှိပြီး သူတို့တွေအတွက် အကူအညီတွေ လိုအပ်နေတာ ဖြစ်ပါတယ်။
“အသက် ၃ နှစ်ကနေစပြီး ၁၆ နှစ်လောက်ထိ ရှိကြတယ်။ အလှူရှင်တွေကို မှီခိုပြီး စားနေရတဲ့ ကလေးတွေဆိုတော့ အလှူရှင်လည်း နည်းတယ်လေ။ ဟင်းဆိုရင် သူတို့စိုက်ထားတဲ့ ဟင်းသီးဟင်းရွက်တွေဘဲ စားနေရတယ်။ ကြက်ဥတောင် မစားနိုင်တဲ့ ကလေးငယ်လေးတွေပါ” ဆိုပြီး နှလုံးသားပရဟိတ အဖွဲ့ခေါင်းဆောင် နေဇော်ထွန်းက ပြောပါတယ်။
ကလေးငယ်တွေက အလှူရှင်တွေရှိမှသာ အသား၊ ငါးတွေ စားရတာဖြစ်ပြီး လက်ရှိမှာ အလှူရှင်တွေ ပါးလာတာကြောင့် မနက်စာကိုပဲ ကောင်းကောင်းစားရတာဖြစ်ပြီး ကျန်တဲ့ နပ်တွေမှာတော့ ဖြစ်သလိုသာ စားနေရတာဖြစ်လို့ ကလေးငယ်တချို့မှာ အာဟာရချို့တဲ့တဲ့ လက္ခဏာတွေပါ တွေ့လာရတယ်လို့ ဆိုပါတယ်။
မိဘမဲ့ကလေးငယ်တွေကို လာရောက်ကူညီ လှူဒါန်းလိုသူတွေအနေနဲ့ [email protected] ကနေတဆင့် ဆက်သွယ်လှူဒါန်းနိုင်သလို ကလေးငယ်တွေရဲ့ တစ်ရက်သာ ကုန်ကျငွေအားဖြင့် ၂ သိန်းဝန်းကျင်ရှိတယ်လို့ သိရပါတယ်။
