အင်းငယ်၊ ဧပြီ ၁၇ ရက်
စစ်ကောင်စီက အကျဉ်းထောင်က အကျဉ်းသားတွေကို လွတ်ငြိမ်းချမ်းသာခွင့် ပေးခဲ့ရာမှာ နိုင်ငံရေးအကျဉ်းသား ၅ ရာခိုင်နှုန်းခန့်သာ ပါဝင်တယ်လို့ အကျဉ်းဦးစီးဌာနနဲ့ နီးစပ်သူတွေက ပြောပါတယ်။
ဒီနေ့ နှစ်ဆန်းတစ်ရက်နေ့ ဧပြီ ၁၇ ရက် မနက်ပိုင်းမှာ လွတ်ငြိမ်းချမ်းသာခွင့် ပေးခဲ့တာဖြစ်ပြီး အကျဉ်းသားဦးရေ ၄,၈၉၃ ဦး ပါဝင်တယ်လို့ ဆိုပါတယ်။
မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်- PPNM ဦးဆောင်ကော်မတီဝင်ဖြစ်သူ ကိုသိုက်ထွန်းဦးက “တစ်ယောက်မှ မလွတ်တာတော့ ဧရာဝတီတိုင်းက ထောင်တွေပေါ့နော်။ ပုသိမ်ကတောင် တစ်ယောက်ပဲလွတ်တော့ မြောင်းမြ၊ ဖျာပုံ၊ ဟင်္သာတ၊ မအူပင် ဒီထောင်တွေမှာတော့ နိုင်ကျဉ်း မပါတာ တွေ့ရတယ်” လို့ ပြောပါတယ်။
ရွှေဖီမြေ သတင်းဌာနအနေနဲ့ ကနဦး ရရှိထားတဲ့ စာရင်းအရ ပေါင်းတည် အကျဉ်းထောင်မှာ အမျိုးသား ၂ ဦး၊ ထားဝယ် အကျဉ်းထောင်မှာ အမျိုးသား ၁ ဦးနဲ့အမျိုးသမီး ၁ ဦး၊ ပြည်အကျဉ်းထောင်မှာ အမျိုးသား ၅ ဦးနဲ့အမျိုးသမီး ၄ ဦး၊ ပခုက္ကူအကျဉ်းထောင်မှာ အမျိုးသား ၄ ဦးနဲ့အမျိုးသမီး ၁ ဦး၊ ညောင်ဦးအကျဉ်းထောင်မှာ အမျိုးသား ၂ ဦးနဲ့အမျိုးသမီး ၂ ဦး၊ ပုသိမ်အကျဉ်းထောင်မှာတစ်ဦး (ကျားမ အတည်မပြုနိုင်) လွတ်မြောက်လာတယ်လို့ သိရပါတယ်။
“အကျဉ်းထောင်ထဲမှာ နိုင်ကျဉ်းများများ ရှိခြင်းဟာ အရေးကြုံလာရင် သူတို့အတွက် ထွက်ပေါက် အများကြီး ရနိုင်တယ်ပေါ့နော်။ ဒါကြောင့်လည်း ပြန်ပေးဆွဲတဲ့အနေနဲ့ ဖမ်းထားတာလို့ ပြောချင်ပါတယ်” လို့ ကိုသိုက်ထွန်းဦးက သုံးသပ်ပါတယ်။
စစ်ကောင်စီဟာ မြေပြင်အခြေအနေမှာ အရေးမသာသေးတာကြောင့် နိုင်ကျဉ်းတွေကို ပြန်မလွှတ်ပေးနိုင်တာ ဖြစ်နိုင်တယ်လို့လည်း နိုင်ကျဉ်းဟောင်းတချို့ဆီက သိရပါတယ်။
စစ်အာဏာသိမ်းကာလ အစပိုင်းတုန်းက စစ်ကောင်စီဟာ နိုင်ကျဉ်းတွေကို အကျဉ်းထောင်ထဲ လုံလုံလောက်လောက် ထားနိုင်ဖို့အတွက် တခြား အကျဉ်းသားတွေကို သောင်းဂဏန်းအထိ ပြန်လွှတ်ပေးခဲ့ပြီး သေဒဏ်ကနေ လျှော့ရက် ပေးတာ၊ နှစ်ကြီးကျ အကျဉ်းသားတွေကို နှစ် ၂၀ အထိ လျှော့ချပေးတာတွေလည်း ပြုလုပ်ခဲ့ဖူးပါတယ်။
