မိုင်းပန်ပျော်၊ မေလ ၂၀ ရက်၊ မိုးမိတ်
တအာင်းတပ်မတော်-TNLA ထိန်းချုပ်ထားတဲ့ ရှမ်းမြောက် မိုးမိတ်မြို့မှာ ကားနဲ့ ဆိုင်ကယ် ယာဉ်တိုက်မှုဖြစ်ပွားပြီး ဆိုင်ကယ်စီးနှင်လာတဲ့ အမျိုးသား ၁ ဦး ပွဲချင်းပြီး သေဆုံးခဲ့တယ်လို့ ဒေသခံတွေက ရွှေဖီမြေကို ပြောပါတယ်။
ဖြစ်စဉ်ဟာ ပြီးခဲ့တဲ့ မေလ ၁၈ ရက်နေ့ ညနေပိုင်း ၆ နာရီဝန်းကျင် မကျီးပင်ကျေးရွာရဲ့ အနောက်ဘက်မှာ ဓာတ်ဆီကုန်လို့ ဆိုင်ကယ်တွန်းလာတဲ့ အမျိုးသား ၁ ဦးရဲ့ အနောက်ကို ကားတစ်စီးက ဝင်တိုက်လိုက်တာကြောင့် ဆိုင်ကယ်တွန်းလာတဲ့ အမျိုးသားဟာ ပွဲချင်းပြီးသေဆုံးခဲ့တယ်လို့ ဖြစ်စဉ်သိရှိသူအမျိုးသားတစ်ဦးက ရွှေဖီမြေကို ပြောပါတယ်။
“ဖြစ်စဉ်က ညနေပိုင်း ၆ နာရီဝန်းကျင်လောက် မကျီးပင်ကျေးရွာရဲ့ အနောက်ဘက်မှာ အဲ့ဒီအမျိုးသားက ဓာတ်ဆီကုန်လို့ ဆိုင်ကယ်တွန်းလာတာ အဲ့ဒါကို ကားတစ်စီးက အနောက်ကနေဝင်တိုက်တာ ဆိုင်ကယ်တွန်းလာတဲ့ အမျိုးသားကတော့ အဲ့နေရာမှာပဲ ပွဲချင်းပြီး သေဆုံးခဲ့တယ်”
ယာဉ်တိုက်ခံရပြီး သေဆုံးသွားခဲ့တဲ့ အမျိုးသားဟာ အသက် ၄၃ နှစ်အရွယ်ရှိတဲ့ ဦးနိုင်စောဦး ဆိုတဲ့သူဖြစ်ပြီး မန္တလေးတိုင်း သပိတ်ကျင်းမြို့နယ်မှာ နေထိုင်တဲ့သူ ဖြစ်ပါတယ်။
ဆိုင်ကယ်ကို ဝင်တိုက်လိုက်တဲ့ ကားသမားဟာ ဒေသခံပြည်သူ့ကာကွယ်ရေးတပ်-PDF အဖွဲ့ကဖြစ်တယ်လို့ ဒေသခံတွေပြောပေမဲ့ ရွှေဖီမြေအနေနဲ့တော့ အတည်မပြုနိုင်သေးပါဘူး။
ယာဉ်တိုက်မှုဖြစ်ပွားပြီးသေဆုံးသွားခဲ့တဲ့ အမျိုးသားအတွက် အဆိုပါကားပိုင်ရှင်က မှားယွင်းကြောင်းဝန်ခံပြီး ပိုက်ဆံ သိန်း ၂၀ နဲ့ ကြေအေးခိုင်းပြီးတော့ လက်မှတ်ရေးထိုးခဲ့တယ်လို့ အထက်ပါအမျိုးသားကဆက်ပြောပါတယ်။
အခုလို လက်နက်ကိုင်ဆောင်ပြီး ဆုံးဖြတ်ချက်ချတာဟာ ပြည်သူတွေအတွက် တရားမျှတမှုမရှိတာကြောင့် တရားမျှတမှုအနေနဲ့ တရားဥပဒေစိုးမိုးရေးနဲ့ ဖြေရှင်းပေးစေချင်တယ်လို့ ၎င်းအမျိုးသားက ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
