ပို့လဘား၊ မတ်လ ၂၂ ရက်၊ ဖယ်ခုံ
ရှမ်းတောင် ဖယ်ခုံမြို့နယ်မှာ လက်လုပ်မိုင်း ဆော့ကစားရာကနေ တစ်ဦးသေဆုံးပြီး ၃ ဦး ထိခိုက်ဒဏ်ရာရခဲ့တယ်လို့ ဖြစ်စဉ်သိရှိသူ အမျိုးသမီးတစ်ဦးက ရွှေဖီမြေကို ပြောပါတယ်။
ဖယ်ခုံမြို့နယ် ကယောကျေးရွာအုပ်စု ဘီသူထက်ရွာမှာ ဒီနေ့ မတ်လ ၂၂ ရက် မနက် ၇ နာရီမှာ ဖြစ်စဉ်ဖြစ်ပွါးခဲ့တာဖြစ်ပါတယ်။
“သူ့သားတစ်ယောက်က ကောက်ယူလာတာ။ ရွာပြင်ကနေ ယူလာတာ။ ရွာနဲ့ ၃ မိုင် ဝေးတယ်။ သူ့အဖေက မိုင်းဖြစ်မှန်း မသိဘဲ ကွမ်းအစ်နဲ့ ပြန်လုပ်မယ်ဆိုပြီး ယူပြန်လိုက်တာ။ အဲမှာပဲ ပေါက်ကွဲပြီး အဖေဖြစ်သူက ပွဲချင်းပြီးသေဆုံးခဲ့တယ်။ သူ့သားနဲ့ သမီးတစ်ယောက်ကတော့ ဒဏ်ရာရတယ်”
အသက် ၃၅ နှစ်အရွယ်ရှိတဲ့ ဦးအေဖရယ်(ခ) ဆိုးဒဲဆိုသူက သေဆုံးခဲ့တာဖြစ်ပြီး အသက် ၁၂ နဲ့ ၁၀ နှစ်အရွယ်ရှိတဲ့ သားနဲ့ အသက် ၅ နှစ်အရွယ်ရှိတဲ့ သမီးတစ်ဦး ထိခိုက်ဒဏ်ရာရရှိခဲ့တာ ဖြစ်တယ်လို့ ဆိုပါတယ်။
လက်ရှိမှာတော့ ထိခိုက်ဒဏ်ရာရတဲ့သူတွေကို ဖရူဆိုအနောက်ဘက်ခြမ်း ဆေးရုံမှာ ကုသပေးနေတာဖြစ်ပြီး ဖခင်ဖြစ်သူရဲ့ အသုဘနဲ့ ကလေးတွေရဲ့ ဆေးကုသစရိတ်အတွက် အကူအညီလိုအပ်နေတယ်လို့ သိရပါတယ်။
