မိုင်းရူပ၊ ဇန်နဝါရီ ၂ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ် တွင်းငယ်ရွာနဲ့ တန်းမြင့်လေ့ကျင့်ရေး သင်တန်းကျောင်း အမှတ်(၁၃)တပ်ရှိ စစ်ကောင်စီတပ်ဖွဲ့ဝင်ကို ပြည်သူ့လွတ်မြောက်ရေးတပ်မတော်- PLA နဲ့ တအာင်းတပ်မတော်- TNLA က ဝိုင်းရံပိတ်ဆို့ထားတယ်လို့ PLA နဲ့ ရှေ့တန်း သတင်းအရင်းအမြစ်တွေက ပြောပါတယ်။
“တွင်းငယ်မှာတော့ ရန်သူနဲ့ အနီးဆုံးမှာ တပ်ဆိုင်ထားတာပေါ့။ သူတို့ ထိုးလာရင် တိုက်ပွဲဖြစ်လိုက် ပြန်ဆုတ်လိုက်နဲ့ပေါ့။ စကစဘက်က အကျအဆုံးရှိရင် ပြန်ဆုတ်သွားတယ်” လို့ PLA ရဲ့ အထွေထွေအတွင်းရေးမှူး ရဲဘော် နီနီကျော်က ရွှေဖီမြေကို ပြောပါတယ်။
ရှေ့တန်း သတင်းအရင်းအမြစ်တစ်ဦးကလည်း တွင်းငယ်ရွာနဲ့ တန်းမြင့်လေ့ကျင့်ရေး သင်တန်းကျောင်း (တကက ၁၃)ကို TNLA နဲ့ ပူးပေါင်းတပ်က ဝိုင်းရံပိတ်ဆို့ထားတယ်လို့ ဆိုပါတယ်။
စစ်တပ်ဟာ တွင်းငယ်ရွာကို ပြန်လည် ထိန်းချုပ်ပြီးနောက်ပိုင်း နေအိမ်တွေကို ဆက်တိုက် မီးရှို့နေပြီး ရွာထဲ စစ်ကောင်စီတပ်ဖွဲ့ဝင် ရှိနေတာကြောင့် မီးရှို့ခံရတဲ့ နေအိမ် အရေအတွက်ကိုတော့ မသိရသေးပါဘူး။
တွင်းငယ်ရွာကို ပြီးခဲ့တဲ့ ၂၀၂၄ ခုနှစ် ဩဂုတ်လကတည်းက TNLA နဲ့ ပူးပေါင်းတပ်က တိုက်ခိုက်သိမ်းပိုက်ထားပြီး ၄ လနီးပါးအကြာမှာ ပြန်လည် လက်လွှတ်ခဲ့ရတာ ဖြစ်ပါတယ်။
သပိတ်ကျင်းမြို့ကို ပြီးခဲ့တဲ့ ဩဂုတ် ၂၅ ရက်မှာ တော်လှန်ရေး အင်အားစုတွေက တိုက်ခိုက်သိမ်းပိုက်ထားနိုင်ပေမဲ့ စစ်ကောင်စီရဲ့ တကက ၁၃၊ ၇ မိုင်နဲ့ တွင်းငယ်ရွာမှာ စစ်တပ်စခန်းတွေ ကျန်ရှိနေတာ ဖြစ်ပါတယ်။
