ရွှေဖီမြေ၊ ဧပြီ ၁၆ ရက်၊ ကော့ကရိတ်
ကရင်ပြည်နယ် ကော့ကရိတ်မြို့နယ် ကျုံဒိုးမြို့ ကမ်းနီစံပြကျေးရွာရှိ ဘုန်းကြီးကျောင်းကို စစ်ကောင်စီတပ်က YAK-130 လေယာဉ်နဲ့ ဗုံးကြဲတိုက်ခိုက်ခဲ့ရာ အရပ်သား ၆ ဦး သေဆုံးပြီး သံဃာအပါအဝင် ၁၇ ဦး ဒဏ်ရာ ရခဲ့ပါတယ်။
မနေ့ ဧပြီ ၁၅ ရက် သင်္ကြန်အကြတ်နေ့ နေ့လယ် ၁၂ နာရီကျော်က တိုက်ခိုက်ခဲ့တာဖြစ်ပြီး အရပ်သား ၇ ဦး၊ ကိုရင် ၈ ပါး၊ ဦးဇင်း ၂ ပါး ဒဏ်ရာရကာ မင်းလင်းပြည့်အောင် (၉ နှစ်)၊ မင်းကွန်ဗလဲ (၃ နှစ်)၊ ကိုမျိုး (၃၄ နှစ်)၊ ဒေါ်သိန်းရှင် (၇၆ နှစ်)၊ မိကျဲကျဲမွန် (၃ နှစ်)၊ မိပိုးဖူးဇင် (၁၅ နှစ်)တို့ သေဆုံးခဲ့ကြောင်း မွန်ပြည်လွတ်မြောက်ရေးတပ်တော်- MLA က ထုတ်ပြန်ထားပါတယ်။
ကျုံဒိုးမြို့ရှိ စစ်ကောင်စီရဲ့ ခမရ ၅၄၅၊ ၅၄၆ တပ်ရင်းက အရပ်သားတွေ နေထိုင်တဲ့ ရေပူကြီး၊ ကော့ဝါလဲ၊ ဝင်းပြ၊ နောင်တမံ၊ သမိန်ဒွတ်၊ တောင်ကမ္မရိုက်၊ မိဂလုံ၊ ကမ်းနီစံပြရွာတွေကို လက်နက်ကြီးနဲ့လည်း ပစ်ခတ်တိုက်ခိုက်ခဲ့တယ်လို့ ဖော်ပြထားပါတယ်။
