ရွှေဖီမြေ၊ မတ်လ ၂၉ ရက်
ငလျင်ဒဏ်ကြောင့် ပြိုကျပျက်စီးတဲ့ နေအိမ်၊ အဆောက်အဦးမှာ ပိတ်မိနေတဲ့ လူထုတွေကို အရေးပေါ် ကယ်ဆယ်ရေးလုပ်ငန်း ဆောင်ရွက်နိုင်ဖို့အတွက် ငလျင်ဘေးသင့်တဲ့ဒေသမှာ မတ်လ ၃၀ ရက်ကစပြီး ၂ ပတ် ကြာတဲ့အထိ ထိုးစစ် ခေတ္တရပ်ထားမယ်လို့ အမျိုးသား ညီညွတ်ရေးအစိုးရ- NUG က ထုတ်ပြန်လာပါတယ်။
NUG ထိန်းချုပ်နယ်မြေမှာလည်း ကုလသမဂ္ဂ ကူညီကယ်ဆယ်ရေးအဖွဲ့နဲ့ နိုင်ငံတကာ အဖွဲ့အစည်း၊ INGOs တွေ အရေးပေါ် ကယ်ဆယ်ရေးနဲ့ ကုသရေးလုပ်ငန်း လုပ်နိုင်ဖို့ လုံခြုံရေး၊ သယ်ယူပို့ဆောင်ရေး၊ ယာယီ ကယ်ဆယ်ကုသရေးစခန်း ဖွင့်လှစ်ရေးကို NUG ဘက်က တာဝန်ယူ ပူးပေါင်းဆောင်ရွက်သွားမယ်လို့ ဆိုပါတယ်။
ဒါ့အပြင် စစ်ကောင်စီ ထိန်းချုပ်နယ်မြေမှာလည်း လုံခြုံရေး အာမခံချက်ရှိရင် CDM ကျွမ်းကျင်ဝန်ထမ်းအနေနဲ့ နိုင်ငံတကာ ကူညီကယ်ဆယ်ရေးအဖွဲ့အစည်းနဲ့ ပူးပေါင်းပြီး အရေးပေါ်ကယ်ဆယ်ရေး၊ ကုသရေးလုပ်ငန်း ဆောင်ရွက်သွားမယ်လို့လည်း ထုတ်ပြန်ချက်မှာ ဖော်ပြထားပါတယ်။
ငလျင်ဘေးသင့်သူတွေကို ကုလသမဂ္ဂ ကူညီကယ်ဆယ်ရေးအဖွဲ့၊ နိုင်ငံတကာ အဖွဲ့အစည်းနဲ့ INGOs တွေ အမြန်ဆုံး ကူညီပေးဖို့ တောင်းဆိုထားပြီး တိုင်းရင်းသားလူထုအနေနဲ့လည်း ငလျင်ဘေးသင့် လူထုတွေအတွက် အရေးပေါ် ကူညီကယ်ဆယ်ရေးလုပ်ငန်းမှာ NUG နဲ့ ပူးပေါင်းပါဝင်ပေးဖို့လည်း တိုက်တွန်းထားပါတယ်။
မနေ့ မတ်လ ၂၈ ရက်က မန္တလေးမြို့ကို ဗဟိုပြု လှုပ်ခတ်ခဲ့တဲ့ ပြင်းအား ၇ ဒသမ ၇ ရှိ ငလျင်ဒဏ်ကြောင့် သေဆုံးသူ ၁,၆၄၄ ဦးအထိ ရှိလာပြီး ဒဏ်ရာရသူ ၃,၄၀၈ ဦး ရှိလာပြီလို့ စစ်ကောင်စီက ထုတ်ပြန်ထားပါတယ်။
