မိုင်းပန်ပျော်၊ ဧပြီလ ၈ ရက်၊ နမ့်ခမ်း
တအာင်းတပ်မတော်-TNLA ထိန်းချုပ်ထားတဲ့ တရုတ်-မြန်မာနယ်စပ် နမ့်ခမ်းမြို့နယ်မှာ Non-CDM တွေအနေနဲ့ ပညာရေးနဲ့ပတ်သတ်တဲ့ ဝန်ဆောင်မှုလုပ်ငန်းအားလုံးကို အကန့်အသတ်မရှိ ရပ်ဆိုင်းလိုက်ပြီလို့ နမ့်ခမ်းမြို့နယ် ပညာရေးမှူးရုံးက ထုတ်ပြန်လိုက်ပါတယ်။
နမ့်ခမ်းမြို့မှာ တအာင်းပြည်ပညာရေးကောင်စီ-TLEC က ဖော်ဆောင်နေတဲ့ ပညာရေးကဏ္ဍတွေမှာ Non-CDM ဝန်ထမ်းတွေ လုံးဝပတ်သက်ခွင့်မပြုထားတာကြောင့် မူကြိုကျောင်း၊ စာကျက်ဝိုင်း၊ ကျူရှင်၊ ဘော်ဒါဆောင်၊ ကိုယ်ပိုင်ကျောင်းနဲ့ ဘာသာရေးအခြေပြုကျောင်းတွေ ဖွင့်လှစ်တာကို အကန့်အသတ်မရှိ ရပ်ဆိုင်းထားတယ်လို့ ဆိုပါတယ်။
စစ်အာဏာရှင်တွေကို တော်လှန်နေတဲ့အချိန်မှာ Non-CDM တွေက အခွင့်ကောင်းယူပြီး စစ်ကောင်စီနဲ့ လက်တွဲပြီး လုပ်ငန်းတွေဖော်ဆောင်တာရှိနေတာကြောင့် လုပ်ငန်းတွေ ရပ်ဆိုင်းတာဖြစ်တယ်လို့ နမ့်ခမ်းမြို့နယ်ပညာရေးမှူးရုံး တာဝန်ရှိသူတစ်ဦးက ရွှေဖီမြေကို ပြောပါတယ်။
“Non-CDM တွေက သူတို့ဖော်ဆောင်နေတဲ့ပညာရေးကို ဆက်သွယ်မှုတွေမရှိဘဲနဲ့ သူတို့ဘာသာသူတို့လုပ်တဲ့အတွက်ကြောင့် ကျနော်တို့လုံးဝခွင့်ပြုပေးမှာမဟုတ်ဘူး။ နောက်ပြီးတော့ သူတို့လုပ်တဲ့လုပ်ရပ်ကတော့ ကလေးတွေခေါ်စုပြီးတော့ ကျနော်တို့နဲ့ မချိတ်ဆက်ဘူး။ စာရင်းလာမသွင်းဘူး။ သူတို့ရတဲ့စာရင်းတွေကို စစ်ကောင်စီနဲ့ လက်တွဲထားတဲ့ အပိုင်းတွေရှိတာပေါ့နော်။ အဲ့ကြောင့် ဒီကိစ္စတွေဟာ ကျနော်တို့ စစ်ကောင်စီကို တော်လှန်နေတဲ့အချိန်မှာ သူတို့ကကြားမှာ စစ်ကောင်စီရဲ့ ဒေါက်တိုင်တစ်ခုအဖြစ်ရပ်တည်ပြီးတော့မှ သူတို့လုပ်ချင်တာလုပ် အဲ့လိုလာလုပ်တော့ ကျနော်တို့လုံးဝလက်ခံမှာမဟုတ်ဘူး”
Non-CDM တွေဟာ ပညာရေးလုပ်ငန်းကို တိုက်ရိုက်ဖြစ်စေ သွယ်ဝိုက်ပြီးဖြစ်စေ ထုတ်ပြန်ထားတဲ့အတိုင်း မလိုက်ရင် အရေးယူသွားမယ်ဖြစ်တယ်လို့ ထုတ်ပြန်ချက်ထဲမှာ ဖော်ပြထားပါတယ်။
နမ့်ခမ်းမြို့ဟာပြီးခဲ့တဲ့ ၂၀၂၃ ခုနစ် ဒီဇင်ဘာ ၁၈ ရက်မှာ တအာင်းတပ်မတော်-TNLA က တိုက်ခိုက်သိမ်းပိုက်နိုင်ပြီး အခုလက်ရှိ အုပ်ချုပ်ရေးယန္တရား ဖော်ဆောင်လာတာ ၁ နှစ်ကျော်ရှိပြီဖြစ်ပါတယ်။
