မြတ်နိုး၊ ဩဂုတ် ၉ ရက်
ကချင်ပြည်နယ် ဖားကန့်မြို့နယ်မှာ လက်နက်ကြီးထိမှန်လို့ တစ်ပတ်အတွင်း အရပ်သား ၉ ဦးခန့် သေဆုံးပြီး ၃၀ ဦးထက်မနည်း ထိခိုက်ဒဏ်ရာရရှိခဲ့ကြောင်း ဒေသခံတွေဆီက သိရပါတယ်။
“ဟုတ်တယ်။ အရပ်သား ပြည်သူတွေ ထိသွားတာ များတယ်။ ပွဲချင်းပြီး ဆုံးတာ ရှိတယ်။ တချို့က ထိခိုက်ဒဏ်ရာရပြီး ဆေးကုရင်း သေဆုံးတာ ရှိတယ်။” လို့ ဒေသခံ လူငယ်အမျိုးသားတစ်ဦးက ပြောပါတယ်။
ဖားကန့်မြို့နယ်မှာ ပြီးခဲ့တဲ့ ဩဂုတ်လ ၁ ရက်နေ့ကနေ ဒီနေ့ ဩဂုတ်လ ၈ ရက်နေ့အထိ လက်နက်ကြီး ထိမှန်ပြီး သေဆုံးသွားသူ ၉ အထိရှိပြီး ထိခိုက်ဒဏ်ရာရရှိသွားသူတွေကတော့ အယောက် ၃၀ ကျော်တယ်လို့ ဆိုပါတယ်။
နောက်ထပ်ဒေသခံ အမျိုးသားတစ်ဦးကလည်း “နေ့တိုင်း တိုက်ပွဲဖြစ်နေတာ။ မနေ့ညရော အခုရော ဖြစ်နေတာ မနားသေးဘူး။” လို့ ပြောပါတယ်။
စစ်ကောင်စီတပ်ဘက်က ဖားကန့်ဗျူဟာကုန်းကနေ လက်နက်ကြီး ပစ်ခတ်တာဖြစ်ပြီး ရှရော်ခ၊ မြောက်ဖြူ၊ ယူမာ၊ဆိုင်းတောင်၊ ဆန်းကြွယ် စတဲ့ရွာတွေမှာ အများဆုံးထိခိုက်ကြောင်းလည်း သူက ပြောပါတယ်။
စစ်ကောင်စီတပ်ဘက်က ကာမိုင်း – ဖားကန့်လမ်းကနေ ကုန်စည်တွေကို သယ်ဆောင်ခွင့်ပြုပေမယ့် ဆန်ကိုတော့ နယ်/လုံရဲ့ ခွင့်ပြုချက်ရမှသာ သယ်ခွင့်ရတယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
