ပျားကြီး၊ ဇူလိုင် ၇၊ ဆားလင်းကြီး
စစ်ကိုင်းတိုင်း၊ ဆားလင်းကြီးမြို့နယ်၊ လက်ပံတောင်းတောင်ဒေသမှာ စစ်ကောင်စီရဲ့စစ်ကြောင်းထိုးမှုတွေကြောင့် ဒေသခံ ၄၀၀၀ နီးပါးဟာ ဘေးလွတ်ရာကိုထွက်ပြေးတိမ်းရှောင်နေရတယ်လို့ ဒေသခံတွေနဲ့ စစ်ရှောင်ကူညီပေးနေသူတွေက ပြောပါတယ်။
ဇွန်လကုန်ပိုင်းကစပြီး လက်ပံတောင်းဒေသကထွက်ကြေးနီတွေသယ်ယူဖို့ ချင်းတွင်းမြစ်အတွင်းဆိုက်ကပ်ထားတဲ့ စစ်ကောင်စီရဲ့သင်္ဘောအုပ်စုကိုအကာအကွယ်ပေးနိုင်ဖို့အတွက် အနီးအနားကျေးရွာတွေကိုအင်အားအလုံးအရင်းနဲ့စစ်ကြောင်းထိုးနေတာဖြစ်ပါတယ်။
“ဒီနေ့ ၂ စီးထွက်သွားတယ်။ ဒါပေမဲ့ အောက်ပိုင်းကနေ သင်္ဘောတွေဆက်တက်လာတယ်လို့ကြားထားတယ်။ မုံရွာဖက်ကလည်း လက်နက်ကြီးနဲ့ထုတယ်။ Paramoter တွေကလည်း ခေါင်းပေါ်မှာ။ လမ်းပေါ်မှားလည်းကင်းပုန်းတွေရှိတယ်။ ဒီကြားထဲစစ်ကြောင်းကလည်းထိုးပြီး မည်းမည်းမြင်ရာပစ်နေတော့ သက်ကြီးရွယ်အိုတွေပါခေါ်ပြီးပြေးရတာပေါ့”လို့ စစ်ရှောင်ကူညီပေးနေသူအမျိုးသားတစ်ဦးက ရွှေဖီမြေကို ပြောပါတယ်။
ညောင်ပင်ကြီး၊ ကျော်ရွာစတဲ့ ကျေးရွာတွေအပါအဝင် လက်ပံတောင်းတောင်နဲ့ ချင်းတွင်းမြစ်ကြားမှာရှိတဲ့ကျေးရွာပေါင်း ၅ ရွာထက်မနည်းက ဒေသခံတွေဟာ ဘေးလွတ်ရာထွက်ပြေးနေရတာဖြစ်တယ်လို့ ဒေသခံတွေကဆိုပါတယ်။
လက်ပံတောင်းဒေသကထွက်တဲ့ စစ်ကောင်စီနဲ့ ဝမ်ပေါင်ကုမ္ပဏီရဲ့ကြေးနီတွေကို အရင်က မော်တော်ယာဥ်တွေနဲ့သယ်ယူလေ့ရှိပေမဲ့ ဒေသခံပြည်သူ့ကာကွယ်ရေးတပ်တွေရဲ့မကြာခဏတိုက်ခိုက်မှုကိုခံရတာကြောင့်နောက်ပိုင်းမှာ အခုလို ချင်းတွင်းမြစ်ရေတက်ချိန်မှာ စစ်သင်္ဘောတွေ ခြံရံပြီး သံခွံဖလက်သင်္ဘောတွေနဲ့ ကြေးနီတွေကိုသယ်ယူနေတာဖြစ်ပါတယ်။
ကြေးနီသယ်ယူမှုတွေဟာ အနည်းဆုံးရက်ပေါင်း ၃၀ ကနေ ၅၀ အထိကြာလေ့ရှိတာကြောင့် ဘေးလွတ်ရာထွက်ပြေးနေရတဲ့ ဒေသခံတွေအနေနဲ့ စားဝတ်နေရေးခက်ခဲမှုတွေကြုံရလေ့ရှိတာတွေ့ရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
