အင်းငယ်၊ ဇန်နဝါရီ ၁၂ ရက်၊ ရပ်စောက်
ရှမ်းတောင် ရပ်စောက်မြို့နယ် ကျောက်ဂူဒေသမှာ ဇန်နဝါရီ ၁၀ ရက် ၁၁ ရက် နှစ်ရက်တာအတွင်း စစ်ကောင်စီတပ်က လေကြောင်းနဲ့ တိုက်ခိုက်ခဲ့တယ်လို့ မြေပြင်သတင်းအရင်းအမြစ်တွေက ပြောပါတယ်။
ကျောက်ဂူဒေသမှာ ဒီဇင်ဘာ ၉ ရက်ကနေ ဒီနေ့ ဇန်ဝါရီ ၁၂ ရက်အထိ တိုက်ပွဲ ဖြစ်ပွားနေတာဖြစ်ပြီး စစ်တပ်ဘက်က အရေးနိမ့်တာကြောင့် လက်နက်ကြီးနဲ့ လေကြောင်း အသုံးပြုလာတာ ဖြစ်ပါတယ်။
ဓနုပြည်သူ့ လွတ်မြောက်ရေးတပ်ဦး- DPLF/DPLA ရဲ့ ပြောရေးဆိုခွင့်ရှိသူ ကိုအမောင်က “လက်နက်ကြီး လေယာဉ်တွေ ပစ်ခံရတာကတော့ အများဆုံးက ဒီကျောက်ဂူဒေသတစ်ဝိုက်က ကျေးရွာတွေ ဖြစ်မယ်။ ကျောက်ဂူ၊ ပယင်းကုန်း၊ ထမင်းပေါင်းတို့ပေါ့။ အားလုံးဆို ၄ ထောင်နီးပါး (စစ်ရှောင်)လောက် ရှိတယ်” လို့ ပြောပါတယ်။
စစ်တပ်က ကျောက်ဂူဒေသအခြေစိုက် အမြှောက်တပ်ရင်း (အမတ ၃၄၉)ကနေ ပစ်ခတ်နေပြီး မြေပြင်အခြေအနေ ရှုပ်ထွေးနေဆဲ ဖြစ်တာကြောင့် ထိခိုက်မှု သိရှိနိုင်ဖို့အတွက် ရွှေဖီမြေ သတင်းဌာနအနေနဲ့ စုံစမ်းနေဆဲ ဖြစ်ပါတယ်။
“ကျနော်တို့လည်း ဒဏ်ရာရရှိမှု ထိခိုက်မှုတွေတော့ အနည်းငယ် ရှိတယ်ဗျာ့။ စစ်ကောင်စီကတော့ သိရသလောက်ဆိုရင်တော့ ဒီဇင်ဘာ ၉ ရက်နေ့ စဖြစ်ကတည်းကဆိုရင်တော့ ၆၀ ဝန်းကျင် ကျဆုံးမှု ရှိတယ်” လို့ ကိုအမောင်က ဆက်ပြောပါတယ်။
ဒဏ်ရာရ စစ်ကောင်စီတပ်ဖွဲ့ဝင်ကို အောင်ပန်း ကုတင် ၇၀၀ စစ်ဆေးရုံမှာ ကုသပေးနေပြီး ပအိုဝ်းပြည်သူ့စစ်- PNA နဲ့ ရှမ်းပြည်တပ်မတော်- RCSS/SSA ကလည်း စစ်တပ် ယူနီဖောင်း ပြောင်းဝတ်ပြီး အင်အား ဖြည့်ထားတယ်လို့ ဒေသခံတွေဆီက သိရပေမဲ့ အတည်မပြုနိုင်သေးပါဘူး။
ဇန်ဝါရီ ၄ ရက်နဲ့ ၅ ရက်နေ့ကလည်း စစ်ကောင်စီရဲ့ အမတ ၃၄၉ အပါအဝင် တောင်ထိပ်နဲ့ အင်တောရွာကြားက စစ်စခန်းကို DPLA က ဝင်ရောက် တိုက်ခိုက်ခဲ့တာကြောင့် စစ်တပ်ဘက်က တုန့်ပြန်တဲ့အနေနဲ့ လက်နက်ကြီး၊ လေကြောင်း အသုံးပြုလာတာလို့လည်း မြေပြင်သတင်းအရင်းအမြစ်တွေက သုံးသပ်ပါတယ်။
လက်ရှိ အခြေနေအရ စစ်တပ်က အင်အားနေ့စဉ် ဖြည့်တင်းနေပြီး လက်နက်ကြီးနဲ့ လေကြောင်း နောက်ထပ် အသုံးပြုလာနိုင်တာကြောင့် တိမ်းရှောင်နေသူတွေအနေနဲ့ နေရပ်သို့ မပြန်လာကြသေးဖို့၊ လက်ရှိ နေထိုင်နေသူတွေလည်း ဘေးလွတ်ရာ အမြန်ဆုံး ရှောင်ကြဖို့ DPLF တပ်ဖွဲ့ဝင်တွေက သတိပေးထားပါတယ်။
