ရွှေဖီမြေ၊ မတ်လ ၂၃ ရက်
မြန်မာနိုင်ငံမှာ စစ်တပ်အာဏာသိမ်း ၄ နှစ်ကာလအတွင်းမှာ ဖမ်းဆီးထောင်ချခံခဲ့ရတဲ့ နိုင်ငံရေးအကျဉ်းသား ၂ သောင်း ၈ ထောင်ကျော် ရှိတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း (AAPP) က ဒီနေ့ မတ်လ ၂၃ ရက်မှာ ထုတ်ပြန်ထားပါတယ်။
အဲဒီ ၂ သောင်း ၈ ထောင်ကျော်ထဲမှာ ၂ သောင်း ၂ ထောင်ကျော်က ဒီနေ့ဒီအချိန်အထိ ထောင်ဒဏ်ချမှတ်ခံထားရဆဲလို့ ပြောပါတယ်။
ဖမ်းဆီးထိန်းသိမ်းခံထားရတဲ့ ၄ နှစ်ကျော်အတွင်းမှာလည်း နိုင်ငံရေးအကျဉ်းသား ၂၀၁၉ ဦး သေဆုံးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ မတ် ၁ ရက်ကနေ ၂၁ ရက်အထိ စစ်ကောင်စီတပ်ရဲ့ လေကြောင်းတိုက်ခိုက်မှုကြောင့်နဲ့ သေနတ်နဲ့ ပစ်ခတ်မှုကြောင့် နိုင်ငံတစ်ဝန်းက အမျိုးသား ၂၉ ဦးနဲ့ အမျိုးသမီး ၁၆ ဦး စုစုပေါင်း ၄၅ ဦး သေဆုံးခဲ့တယ်လို့ ဆိုပါတယ်။
၂၀၂၁ ခုနှစ် ဖေဖော်ဝါရီ ၁ ရက်ကနေ အာဏာသိမ်းပြီးနောက်ပိုင်း စစ်ကောင်စီတပ်က လူ့အခွင့်အရေးချိုးဖောက်မှုကို ကျယ်ကျယ်ပြန့်ပြန့်နဲ့ စနစ်တကျ ကျူးလွန်ခဲ့ပြီး မြန်မာပြည်သူတို့ရဲ့ လူ့အခွင့်အရေးချိုးဖောက်မှု အဆိုးရွားဆုံးအခြေအနေနဲ့ ရင်ဆိုင်နေကြရတယ်လို့ AAPP ရဲ့ မတ်လ ၂၃ ရက် ၂၅ နှစ်ပြည့်မှာ ထုတ်ပြန်ထားပါတယ်။
စစ်တပ် အာဏာစသိမ်းတဲ့ ၂၀၂၁ ခုနှစ် ဖေဖော်ဝါရီ ၁ ရက်ကစပြီး မတ်လ ၂၁ ရက်အထိ ၄ နှစ်ကျော်အတွင်း စစ်ကောင်စီတပ်နဲ့ ၎င်းတို့ရဲ့လက်ပါးစေတွေကြောင့် နိုင်ငံတစ်ဝှမ်းက လူပေါင်း ၆ ထောင်ကျော် (၆၄၃၅) ဦး သေဆုံးခဲ့တယ်လို့ AAPP က ထုတ်ပြန်ချက်အရ သိရပါတယ်။
ဒါ့အပြင် ဖမ်းဆီးခံခဲ့ရသူ စုစုပေါင်း ၃ သောင်းနီးပါး (၂၈,၉၁၀) ဦးရှိပြီး အဲဒီအထဲ (၂၂,၁၂၃) ဦးဟာ ထိန်းသိမ်းခံနေရဆဲဖြစ်ပြီး ထိန်းသိမ်းခံနေရသူတွေထဲက (၁၀,၆၉၇) ဦးဟာ ထောင်ဒဏ်ချမှတ်ခံထားရတာ ဖြစ်ပါတယ်။
