ပျားကြီး၊ မတ်လ ၁၅ ရက်၊ ပွင့်ဖြူ
မကွေးတိုင်း ပွင့်ဖြူမြို့နယ် အနောက်မြောက်ဖက် မုန်းဇလဲရွာမှာ ရွာလုံးကျွတ်နီးပါး မီးလောင်မှု ဖြစ်ပွားခဲ့တာကြောင့် ဒေသခံ ၁,၅၀၀ နီးပါးဟာ အရေးပေါ် အကူအညီ လိုအပ်နေတယ်လို့ ဒေသခံ ပရဟိတသမားတွေက ပြောပါတယ်။
မတ်လ ၁၂ ရက် နေ့လယ် ၂ နာရီဝန်းကျင်က ဖြစ်ပွားခဲ့တဲ့ မီးလောင်မှုကြောင့် အသက် ၇၀ ဝန်းကျင်အရွယ် ဒေသခံတစ်ဦး သေဆုံးခဲ့ပြီး ကျေးရွာမှာရှိတဲ့ နေအိမ် စုစုပေါင်းရဲ့ ၈၀ ရာခိုင်နှုန်းကျော် ပျက်စီးဆုံးရှုံးခဲ့ရတာ ဖြစ်ပါတယ်။
“မီးလောင်တာက အိမ်ခြေ ၃၈၀ နီးပါးလောက် ရှိမယ်။ မီး မကူးဖို့ ဖျက်ပစ်လိုက်ရတဲ့ အိမ်တွေလည်း ရှိတယ်။ အိမ်မွေးတိရစ္ဆာန်တွေလည်း သေတယ်။ အလှူကလည်း ရှိနေတော့ အိမ်တွေမှာ လူမရှိလို့ ဘာမှမရလိုက်ကြတဲ့သူချည်းပဲ။ အကုန်လုံး ဆုံးရှုံးတာပေါ့” လို့ ဒေသခံ ပရဟိတသမားတစ်ဦးက ပြောပါတယ်။
အိမ်ခြေပေါင်း ၅၀၀ ကျော်ရှိတဲ့ မုန်းဇလဲကျေးရွာဟာ မီးလောင်မှုကြောင့် နေအိမ်စုစုပေါင်း ၄၂၀ ပျက်စီးဆုံးခဲ့ရပြီး အိမ်မွေးတိရစ္ဆာန် နွားနဲ့ ဝက်အကောင်ရေ ၂၀ နီးပါးလည်း သေကြေပျက်စီးခဲ့တယ်လို့ ဒေသခံတွေက ပြောဆိုပါတယ်။
ဒီမီးလောင်မှုဟာ ဒေသတွင်းမှာ စစ်ကြောင်းထိုးပြီး ရွာစဥ်ပတ် မီးရှို့နေတဲ့ စစ်ကောင်စီတပ်ရဲ့လက်ချက် မဟုတ်ဘဲ ပေါ့ဆမီးကြောင့် ဖြစ်နိုင်တယ်လို့ ဒေသခံတွေက သုံးသပ်ပြောဆိုပါတယ်။
လတ်တလောမှာ မီးဘေးသင့် ဒေသခံတွေက ကျေးရွာအပြင်နဲ့ ဘုန်းတော်ကြီးကျောင်းမှာ ဖြစ်သလို နေထိုင်နေရတယ်လို့ ဒေသခံတွေဆီက သိရပါတယ်။
