ရွှေဖီမြေ၊ မတ်လ ၂ ရက်၊ ပန်လုံ
ရှမ်းမြောက် နမ္မတူမြို့နယ် ပန်လုံဒေသမှာ နေထိုင်သူတွေဟာ သောက်သုံးရေ သွယ်တန်းဖို့အတွက် အခက်အခဲ ကြုံနေရပြီး အဝီစိ မတူးနိုင်သူတွေဟာ ရွာနဲ့ ၂ မိုင်ခန့်ဝေးတဲ့နေရာကနေ ရေ သွားခပ်နေကြရပါတယ်။
ပန်လုံဒေသခံ ဦးခမ်းအွယ်က “ကျနော်တို့ရွာက ရေ အရမ်းလိုအပ်တယ်။ ရွာမှာ ရေမရှိတော့ ပြောင်းခြံထဲမှာ သွားခပ်နေရတယ်။ အရမ်းဝေးတော့ ပင်ပန်းတယ်” လို့ ပြောပါတယ်။
ကျေးရွာအတွင်း ရန်ပုံငွေ စုဆောင်းခဲ့ပေမဲ့ ရေသွယ်တန်းဖို့အတွက် မလုံလောက်သေးတာကြောင့် ရေသွယ်မယ့်လုပ်ငန်းကို မလုပ်နိုင်သေးဘဲ ရပ်တန့်ထားရပါတယ်။
ကျေးရွာအတွင်း ရေ အခက်အခဲကြောင့် ကျေးရွာအတွင်း သာရေး၊ နာရေးအတွက် အခက်အခဲရှိသလို မီးဘေးအန္တရာယ် ကာကွယ်ဖို့အတွက်လည်း အခက်အခဲ ရှိတယ်လို့ ဆိုပါတယ်။
“နွေရာသီမှာတော့ ရေမရှိတော့ မီးလောင်ရင် ဒုက္ခရောက်တယ်။ မီးဘေးမဖြစ်အောင် ပတ်ဝန်းကျင်ကို သန့်ရှင်းရေးလုပ်ပြီး အမြဲသတိထားနေရတယ်” လို့ သူက ဆက်ပြောပါတယ်။
လွန်ခဲ့တဲ့ ၂၀၁၁ ခုနှစ်က Welt Hunger Hilfe- WHH အဖွဲ့က ကျေးရွာအတွင်း ရေရရှိရေး စီမံကိန်းတစ်ခု လုပ်ဆောင်ပေးခဲ့ပေမဲ့ ရေဖြန့်ရေးစနစ် မှားယွင်းမှုကြောင့် ပျက်သွားတယ်လို့ ရွာခံတွေက ပြောပါတယ်။
ရေဖြန့်ဝေရေး စနစ်တကျ ဖြစ်စေဖို့ သက်ဆိုင်ရာ အုပ်ချုပ်သူအဖွဲ့အနေနဲ့ စနစ်တကျ စီမံဆောင်ရွက်ပေးဖို့ ရွာခံတွေက လိုလားနေကြပါတယ်။
ကျေးရွာ ရေကော်မတီ ဦးရွှေခမ်းက “ပန်လုံကျေးရွာမှာ ရေပိုက် အကူအညီ လိုအပ်ပေမဲ့ ရေဖြန့်ဝေစနစ် ကောင်းဖို့လည်း လိုအပ်ပါတယ်” လို့ ပြောပါတယ်။
လက်ရှိမှာ နွေရာသီကာလ ရောက်လာပြီ ဖြစ်တဲ့အတွက် ရေ ရှားပါးမှုပြဿနာ ကြုံမှာကိုလည်း ဒေသခံတွေက စိုးရိမ်နေကြပါတယ်။
