လွေးဇွန်မိုး၊ ဖေဖော်ဝါရီ ၁၈ ရက်၊ နမ့်ခမ်း
တအာင်းတပ်မတော်- TNLA ရဲ့ တပ်သားတွေက ဖမ်းဆီးရိုက်နှက်ခဲ့တဲ့ နမ့်ခမ်းမြို့နယ် အထက်ပန်ယုတ်ရွာက အသက် ၄၅ နှစ်အရွယ် ရွာအုပ်ချုပ်ရေးမှူး တာနိုင်ကျင်နဲ့ တာအနေအျကို TNLA တပ်သားက လာရောက် တောင်းပန်ခဲ့ပြီး နှစ်ဦးနှစ်ဖက်အကြား ပြေလည်မှု ရသွားတယ်လို့ ဒေသခံတွေက ပြောပါတယ်။
ပြီးခဲ့တဲ့ ဖေဖော်ဝါရီ ၁၆ ရက် ညမှာ TNLA ဗျူဟာ (၄)ရဲ့ ဗျူဟာမှူးနဲ့ ရွာခံ ၂ ဦးကို ရိုက်နှက်ခဲ့တဲ့ တပ်ရင်း (၄၄၁)ရဲ့ တပ်ရင်းမှူး၊ ဒုတပ်ရင်းမှူးနဲ့ တပ်သား ၂ ဦးကိုယ်တိုင် ရိုက်နှက်ခံခဲ့ရတဲ့ ရွာခံနှစ်ဦးကို ရပ်ရွာလူကြီးရဲ့ ရှေ့မှာ လာရောက်ကန်တော့ပြီး တောင်းပန်ခဲ့တယ်လို့ ရိုက်နှက်ခံခဲ့ရတဲ့ တာနိုင်ကျင်က ပြောပါတယ်။
“ပိုက်ဆံ ၅ သိန်း ထည့်ပြီးတော့ လာကန်တော့ပြီး တောင်းပန်တာပေါ့။ ရိုက်တဲ့သူတွေကတော့ စကားတစ်ခွန်းမှတော့ မပြောဘူး။ ဒီအတိုင်းပဲ ကန်တော့တာ။ သူတို့စိတ်ထဲ ကျေနပ်လား မကျေနပ်လားတော့ မသိဘူးလေ။ သူတို့ရဲ့ အထက်လူကြီးက သူတို့ကို ကန်တော့ခိုင်းတော့ ကန်တော့ရတာပေါ့။ ခွင့်လွှတ်ပေးဖို့ ဘာညာလည်း သူတို့နဲ့ ပါလာတဲ့ သူတို့အထက်လူကြီးကပဲ အကုန်ပြောတာ။ ရိုက်တဲ့သူတွေကိုယ်တိုင်ကတော့ ဘာမှမပြောဘူး”
လက်ရှိမှာ ဒဏ်ရာရတဲ့ ရွာခံ ၂ ဦးကို TNLA ဘက်က အခမဲ့ ဆေးကုပေးမှာဖြစ်တဲ့အပြင် ကားသမားတွေဆီကနေ ကောက်ခံထားတဲ့ ငွေတွေကိုလည်း ပြန်ပေးဖို့နဲ့ နောက်နောင် ဒေသခံနဲ့ TNLA တပ်သားကြား အခုလိုကိစ္စ ထပ်မဖြစ်ရအောင် TNLA တပ်သားတွေအနေနဲ့ အကူအညီ တစ်စုံတစ်ရာ လိုအပ်လာရင် ရွာတာဝန်ရှိသူနဲ့ အရင်ဆုံး တွေ့ဆုံဆွေးနွေးမယ်လို့ ပြောခဲ့တဲ့အကြောင်းကိုလည်း တာနိုင်ကျင်က အခုလို ဆက်ပြောပြပါတယ်။
“နောက်နောင် အကူအညီလိုရင် ရွာကတာဝန်ရှိသူတွေနဲ့ အရင်တွေ့ဆုံ ဆွေးနွေးမယ်လို့တော့ ပြောသွားပါတယ်။ ကျနော်တို့ဘက်ကလည်း အဲလိုဖြစ်စေချင်တာပေါ့။ အခုသူတို့ လုပ်သွားတဲ့ပုံစံကတော့ အဆင်မပြေဘူးလေ။ ရိုက်ခံခဲ့ရတဲ့ ကျနော်တို့ ကာယကံရှင်တွေကတော့ နာတာပေါ့။ အခုချိန်ထိ ခြေထောက်က ထောနဲ့ထောနဲ့ပဲ သွားနေရတာ။ မျက်နှာတွေ နားထင်တွေကလည်း အခုထိ ကိုက်နေတုန်းပဲ။ ဒါပေမဲ့လည်း ဘာမှမတတ်နိုင်ဘူးလေ။ ဆေးရုံသွားပြရင် ပိုက်ဆံ ပေးစရာ မလိုဘူးလို့တော့ ပြောပါတယ်။ ဆေးဖိုးတော့ မလိုပေမဲ့ လမ်းစရိတ် စားစရိတ်တွေကတော့ လိုတာပဲလေ”
ဖြစ်စဉ်ဟာ ပြီးခဲ့တဲ့ ဖေဖော်ဝါရီ ၇ ရက်မှာ မိုင်းဝီးရှိ TNLA ရဲ့ ဗျူဟာ(၄) လက်အောက်ခံ တပ်ရင်း(၄၄၁) တပ်ရင်းမှူးက ရပ်ရွာလုံခြုံရေး တပ်ဖွဲ့ဝင် ၂ ဦးကို အထက်ပန်ယုတ်ရွာထဲက ကားရှိတဲ့ နေအိမ်တွေကို ဟင်းဖိုးဆိုပြီး တစ်အိမ် ၅ သောင်း သွားတောင်းခိုင်းရာကနေ ရွာခံနဲ့ အငြင်းပွားမှုဖြစ်ပြီး တာနိုင်ကျင်နဲ့ တာအနေအျတို့ ဖမ်းဆီးရိုက်နှက်ခဲ့တာပဲ ဖြစ်ပါတယ်။
လက်ရှိမှာ ရွာခံ ၂ ဦးကို ရိုက်နှက်ခဲ့တဲ့ TNLA တပ်သားတွေကိုတော့ စစ်စည်းကမ်း ဥပဒေအရ အပြစ်ပေး အရေးယူထားတယ်လို့ TNLA ရဲ့ ရပ်ရွာလုံခြုံရေးဌာနရဲ့ ဌာနမှူးဖြစ်သူက ရွှေဖီမြေကို ပြောပါတယ်။
နမ့်ခမ်းမြို့နယ်ကို ၁၀၂၇ စစ်ဆင်ရေး ပထမလှိုင်းအတွင်း ပြီးခဲ့တဲ့ ၂၀၂၃ ခုနှစ် ဒီဇင်ဘာ ၁၉ ရက်မှာ TNLA က အပြီးသတ်သိမ်းပိုက်ပြီး အုပ်ချုပ်နေတာလည်း ဖြစ်ပါတယ်။
