လွေးထွေး၊ ဇန်နဝါရီ ၈ ရက်၊ နမ့်ဆန်
မိုးနဲ့ ဆောင်းရာသီမှာ ကမျဉ်းနီကောင် ပိုကိုက်ခံရတတ်တဲ့ ရာသီဖြစ်ပြီး ပြီးခဲ့တဲ့ ၂၀၂၄ ခုနှစ် တစ်နှစ်အတွင်း နမ့်ဆန်မြို့နယ်က အသက် ၄ နှစ်အရွယ်သာ ရှိသေးတဲ့ ကလေးတစ်ဦးအပါအဝင် ၄ ဦး သေဆုံးခဲ့တယ်လို့ နမ့်ဆန်မှ အထက်တန်းသူနာပြု ဒေါ်ခင်အုံးကြည်က ရွှေဖီမြေကို ပြောပါတယ်။
ကမျဉ်းနီကောင်ဟာ လူတွေရဲ့ အသားနုတဲ့ အပိုင်းဖြစ်တဲ့ ပေါင်အရင်း၊ ဂျိုင်း၊ လည်ပင်းနဲ့ ဝမ်းဗိုက် စတဲ့နေရာမှာ ကိုက်လေ့ ရှိတယ်လို့ ဆိုပါတယ်။
ဒေါ်ခင်အုံးကြည်က “ကျမတို့ဆီ ရောက်လာတဲ့ လူနာတွေက များတယ်။ အဲထဲမှာမှ နောက်ဆုံးအဆင့်နဲ့ လာတာမဟုတ်ရင် အကုန်သက်သာတယ်။ အဲလိုသေဆုံးသွားတယ်ဆိုတာက နောက်ဆုံးအဆင့် အရမ်းအခြေအနေဆိုးမှ ရောက်လာလို့ ကယ်လို့ မရတော့တာ” လို့ ပြောပါတယ်။
ကမျဉ်းနီ ကိုက်ခံရရင် ခေါင်းကိုက်တာ၊ မူးဝေတာ၊ ချမ်းတုန်တာ၊ မအီမသာဖြစ်တာ၊ ဝမ်းဗိုက် နာတာနဲ့ အန်တာ စတဲ့လက္ခဏာတွေ ဖြစ်တတ်ပြီး ၃ ရက်အထက် အဖျား မကျရင် ခန္ဓာကိုယ်ပေါ် အကောင် ကိုက်ခံထားရတာ ရှိမရှိ စစ်ဆေးကြည့်ဖို့ လိုအပ်ကြောင်းလည်း သူမက ဆက်ပြောပါတယ်။
ကမျဉ်းနီကောင်ဟာ အိမ်မွေးတိရိစ္ဆာန်၊ စိုက်ပျိုးရေးခြံ၊ မြက်ခင်း၊ ကောက်ရိုးပုံနဲ့ ပြောင်းဖူးခင်း စတဲ့နေရာမှာ ခိုအောင်းနေထိုင်တတ်တယ်လို့လည်း ဆိုပါတယ်။
အလားတူ ပြီးခဲ့တဲ့ ၂၀၂၄ ခုနှစ် ဒီဇင်ဘာ လကုန်နဲ့ ၂၀၂၅ ခုနှစ် ဇန်နဝါရီ လဆန်းမှာလည်း နမ့်ဆန်မြို့နယ်က ကျေးရွာတချို့မှာ ကမျဉ်းနီကောင် ကိုက်ခံရပြီး သေဆုံးသွားသူ ရှိတယ်လို့ ဒေသခံတွေက ပြောဆိုကြပေမဲ့ ဖုန်းလိုင်းနဲ့ အင်တာနက်လိုင်း ဖြတ်တောက်ခံထားရတာကြောင့် ရွှေဖီမြေက သတင်းအချက်အလက် အတည်ပြုချက် မရခဲ့ပါဘူး။
