မိုင်းရူပ၊ ဇန်နဝါရီ ၂ ရက်၊ မိုးကုတ်
တအာင်းတပ်မတော်- TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့မှာ တော်လှန်ရေး အင်အားစုရဲ့ နာမည်တွေ သုံးပြီး ငွေ လိုက်လံ လိမ်လည်နေသူ အမျိုးသား ၉ ဦးကို ဖမ်းမိခဲ့ပါတယ်။
အဲဒီအမျိုးသား ၉ ဦးကို ၂၀၂၄ ဒီဇင်ဘာ ၂၅ ရက်မှာ ရှမ်းပြည်နယ်မြောက်ပိုင်း မဟာမိတ်တပ်ရင်း- NSSAA က ဖမ်းဆီးရမိခဲ့တာဖြစ်ပြီး လက်ရှိမှာတော့ ၎င်းတို့ကို TNLA ထံ လွှဲပြောင်းပေးခဲ့ပါတယ်။
“ဖမ်းမိထားတဲ့သူတွေကို တရားဥပဒေ စိုးမိုးရေးတပ်ဖွဲ့ဆီ အပ်လိုက်ပြီ။ ပြီးခဲ့တဲ့ အပတ်က ဓားပြတိုက်မှုနဲ့ ဆိုင်မဆိုင်တော့ မသိသေးဘူး” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
အဲဒီအမျိုးသား ၉ ဦးထဲမှ ၃ ဦးဟာ TNLA တပ်ဖွဲ့ရဲ့ ရပ်ရွာလုံခြုံရေးအဖွဲ့ထဲကဖြစ်ကြောင်း ဖြစ်စဥ်ကို သိရှိထားတဲ့ သတင်းအရင်းအမြစ်တစ်ဦးက ပြောပြီး အတည်ပြုနိုင်ဖို့ ရွှေဖီမြေက PSLF/TNLA ရဲ့ ပြောရေးဆိုခွင့်ရှိသူ လွေးယေဦးကို ဆက်သွယ်မေးမြန်းထားဆဲ ဖြစ်ပါတယ်။
“TNLA ရဲ့ ရပ်ရွာလုံခြုံရေးအဖွဲ့ ပါတယ်လို့ သိထားရတယ်။ သုံးယောက် ပါတယ်။ အခု NSSAA က TNLA ကို လွှဲထားတယ်။ စစ်ချက် အသေးစိတ်တော့ မထွက်သေးဘူး” လို့ သတင်းအရင်းအမြစ်က ပြောပါတယ်။
ပြီးခဲ့တဲ့ ဒီဇင်ဘာ ၁၉ ရက်က မိုးကုတ်မြို့နယ် ၇ မိုင်ရွာက နေအိမ်တစ်ခုမှာ ဓားပြ ဝင်တိုက်ခံရပြီး အဲဒီအမှုဟာ လက်ရှိ ဖမ်းဆီးထားတဲ့ ၉ ဦးနဲ့ ဆက်စပ်မှု ရှိမရှိဆိုတာကိုတော့ ရွှေဖီမြေက ဆက်လက် စုံစမ်းနေဆဲ ဖြစ်ပါတယ်။
မိုးကုတ်မြို့ကို ပြီးခဲ့တဲ့ ဇူလိုင် ၂၅ ရက်မှာ TNLA နဲ့ ပူးပေါင်းတပ်ဖွဲ့က သိမ်းပိုက်နိုင်ခဲ့ပြီး အုပ်ချုပ်ရေးယန္တယား လည်ပတ်နေသလို လေကြောင်း စိုးရိမ်ချက်ကြောင့်ဆိုပြီး ဖုန်းလိုင်းနဲ့ အင်တာနက်လိုင်းလည်း ပိတ်ပင်ထားပါတယ်။
