ပို့လဘား၊ ဇန်နဝါရီ ၈ ရက်၊ မိတ္ထီလာ
မန္တလေးတိုင်း မိတ္ထီလာမြို့မှာ စစ်ကောင်စီတပ်က လူငယ်ပိုင်းတွေကို စစ်မှုထမ်း ခေါ်နေပြီး မသွားတဲ့ အိမ်တွေဆီကနေ ငွေတောင်းတာတွေ ရှိနေတယ်လို့ ဒေသခံတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဒီဇင်ဘာ ၃၀ ရက်မှာ မိတ္ထီလာမြို့ နန်းတော်ကုန်းရပ်ကွက် နယ်မြေ ၁၊ ၂၊ ၃ မှာ အသက် ၁၈ နှစ်ကနေ ၃၅ နှစ်အရွယ် လူငယ် ၆၂ ဦးကို စစ်တပ်က စစ်မှုထမ်းဖို့အတွက် အုပ်ထိန်းသူတွေကို အစည်းအဝေး ခေါ်ယူခဲ့တယ်လို့ ဆိုပါတယ်။
“စစ်မှု မထမ်းတဲ့သူတွေကို ပိုက်ဆံတစ်သိန်း ကောက်တာပေါ့။ သွားတဲ့လူကတော့ မရှိသေးဘူး။ အုပ်ချုပ်ရေးမှူးအဖွဲ့တွေက ပိုက်ဆံ လာကောက်တော့ ပိုက်ဆံဘဲ ပေးကြတာပေါ့ေနာ်။ ကျနော်တို့ပေးတဲ့ ပိုက်ဆံတွေကို လူငှားပြီး စစ်မှု ထမ်းမယ့်သူတွေ ပေးမယ်ပေါ့။ သူတို့ကို သွားခိုင်းမယ်ဆိုပြီး တာဝန်ရှိသူတစ်ဦးက အဲလိုမျိုး ပြောသွားတယ်။ တချို့သူတွေကလည်း အဆင်မပြေသေးဘူး။ ခဏ စောင့်ပေးပါဆိုပြီး ပြောတယ်။ သူတို့က နောက်တခါမှ ပြန်လာကောက်မယ်ဆိုပြီး ပြောတယ်”
ပြီးခဲ့တဲ့ ဒီဇင်ဘာ ၃၁ ရက်က လူငယ် ၆၂ ဦးရဲ့ မိဘတွေကို အစည်းအဝေး ခေါ်ယူပြီး ဇန်နဝါရီ ၅ ရက်မှာေတာ့ ငွေ လာတောင်းတာလို့ ဆိုပါတယ်။
နိုင်ငံအနှံ့မှာ စစ်ရှုံးနေတဲ့ စစ်တပ်ဟာ စစ်မှုထမ်းဖို့အတွက် ၎င်းတို့ ထိန်းချုပ်ထားတဲ့ နေရာမှာ အသက်ပြည့်တဲ့ လူငယ်တွေကို တပ်သားသစ်အဖြစ် အတင်းအဓမ္မ စုဆောင်းတာနဲ့ ပေါ်တာ ဆွဲတာတွေ မကြာခဏ ပြုလုပ်နေပါတယ်။
လက်ရှိမှာ စစ်တပ်ဟာ စစ်မှုထမ်းသင်တန်းအပတ်စဉ်(၈)အထိ ဖွင့်လှစ်ထားပြီး အပတ်စဉ်တစ်ခုကို သင်တန်းသားဦးရေ ၅ ထောင်အထိ သတ်မှတ်ထားပါတယ်။
