မိုင်းပန်ပျော်၊ ဇန်နဝါရီ ၂၉ ရက်၊ ၁၀၅ မိုင်
တရုတ်နှစ်သစ်ကူးအတွင်း စစ်ကောင်စီ ထိန်းချုပ်ထားတဲ့ မူဆယ်မြို့နဲ့ ညီနောင်မဟာမိတ် ၃ ဖွဲ့ ထိန်းချုပ်ထားတဲ့ ၁၀၅ မိုင်လမ်း ပြန်ဖွင့်နေပြီလို့ စုံစမ်းသိရှိရပါတယ်။
၁၀၂၇ စစ်ဆင်ရေး စတင်ကတည်းက စစ်ကောင်စီ ပိတ်ပင်ထားတဲ့ ၁၀၅ မိုင်နဲ့ မူဆယ်မြို့လမ်းကို တရုတ်နှစ်သစ်ကူးအတွင်း ဖွင့်ပေးမှာဖြစ်တယ်လို့ ၁၀၅ မိုင်မှာ နေထိုင်တဲ့ အမျိုးသားတစ်ဦးက ရွှေဖီမြေကို ပြောပါတယ်။
“ရွာကလူတွေက သူတို့ မူဆယ်မှာနေပြီး အိမ်ကို ပြန်လာလည်တာ။ ကားရော ဆိုင်ကယ်ရော အကုန်သွားလို့ ရတယ်တဲ့။ စစ်ဆေးမေးမြန်းတာတွေတော့ ရှိတယ်”
နောက်ထပ် အမျိုးသားတစ်ဦးကတော့ ၁၀၅ မိုင်နဲ့ မူဆယ်မြို့လမ်းပိုင်းကို နှစ်သစ်ကူး မတိုင်ခင်ကလည်း စစ်တပ်က ဖွင့်ထားပေမဲ့ ကားအမျိုးအစားပေါ် မူတည်ပြီး ငွေသိန်းနဲ့ချီ တောင်းတာတွေ ရှိတယ်လို့ ရွှေဖီမြေကို ပြောပါတယ်။
“အဲ့လမ်းက အရင်ကတည်းက သွားတာ။ ကုန်ပါတဲ့ ကားတွေဆိုရင် သိပ်မသွားဖြစ်ဘူး။ အဲဘက်မှာ သူတို့က ပိုက်ဆံ တောင်းတာများတော့ ဘယ်သူမှ မသွားဖြစ်ဘူး။ အိမ်စီးကားတွေ လက်ဖက်ရည်ဖိုးပေးပြီးသွားလို့ရတယ်”
ကုန်တင်ကားတွေဟာ ကုန်အနည်းငယ်သာ တင်ရင်လည်း ကားတစ်စီးကို အနည်းဆုံး ၂ သိန်းကနေ ၃ သိန်းအထိ စစ်ကောင်စီက တောင်းတာတွေ ရှိတယ်လို့ ပြောပါတယ်။
မူဆယ်မြို့အထွက်မှာ စစ်တပ်က ခံစစ် ပြင်ဆင်ထားတာကြောင့် သွားလာခွင့်ကို ပိတ်ပင်ခဲ့တာဖြစ်ပြီး မိုင်းလည်း မကြာခဏ ပေါက်ကွဲတာတွေ ဖြစ်ပွားနေတယ်လို့ ဆိုပါတယ်။
