မြတ်နိုး၊ မတ်လ ၁၅ ရက်၊ ဖားကန့်
ကချင်ပြည်နယ် ဖားကန့်မြို့နယ် ဝါရာဇွပ်ရွာကနေ ရှဒူးဇွပ်ရွာဘက် ချီတက်လာတဲ့ ဝါရာဇွပ် ပြည်သူ့စစ် စစ်ကြောင်းကို မနေ့ မတ်လ ၁၄ ရက် မနက် ၇ နာရီခန့်မှာ KIA နဲ့ ပူးပေါင်းတပ်ဖွဲ့က ကြားဖြတ် မိုင်းဆွဲတိုက်ခိုက်ရာ သေဆုံးထိခိုက်မှု ရှိကြောင်း ရှေ့တန်းနဲ့ နီးစပ်သူတွေဆီက သိရပါတယ်။
“ဝါရာဇွပ် ပြည်သူ့စစ် အင်အား ၅၀ လောက်ကို မိုင်းဆွဲတိုက်ခိုက်တာ။ ၁၀ ယောက်ကျော် သေတယ်လို့ သိရတယ်။ လေယာဉ်နဲ့လည်း ဗုံး လာကြဲတယ်” လို့ ရှေ့တန်းနဲ့ နီးစပ်သူတစ်ဦးက ပြောပါတယ်။
မိုင်းဆွဲ တိုက်ခိုက်ပြီးနောက် အပြန်အလှန် ပစ်ခတ်တိုက်ခိုက်မှု ရှိခဲ့တယ်လို့ သိရပြီး စစ်ကောင်စီတပ်က ဝါရာဇွပ်ရွာဘက် လေယာဉ်နဲ့ ဗုံးကြဲ တိုက်ခိုက်ခဲ့တယ်လို့ သိရပါတယ်။
“မနေ့ကမနက် ဝါရာဇွပ် ပြည်သူ့စစ်တပ်ဖွဲ့ ထိခိုက်တာ များသွားလို့ နေမယ်။ ဝါရာဇွပ်ရွာက ဒေသခံတွေရဲ့ နေအိမ် ၁၆ အိမ် မီးရှို့ဖျက်ဆီးသွားတယ်” လို့ ဒေသခံတစ်ဦးက ပြောပါတယ်။
ဝါရာဇွပ် ပြည်သူ့စစ်က မနက်အစောပိုင်းကတည်းက ရွာဘက် ဝင်ရောက်သွားခဲ့တာလို့ သိရတယ်လို့ သူက ဆက်ပြောပါတယ်။
ဒါ့အပြင် ဝါရာဇွပ်ရွာနဲ့ ကပ်လျက်ရှိတဲ့ နမ်ဆိုင်ရွာဘက်လည်း မနေ့က လေကြောင်းကနေ တိုက်ခိုက်ခံခဲ့ရတယ်လို့ သိရပေမဲ့ ထိခိုက်မှု အသေးစိတ်ကိုတော့ မသိရသေးပါဘူး။
မနေ့မနက် ၇ နာရီခန့်က ဝါရာဇွပ်ရွာနဲ့ နမ်ဆိုင်အနီးက KIA နဲ့ ပူးပေါင်းတပ်ဖွဲ့ရဲ့ ဂိတ်ကို တိုက်ခိုက်ခဲ့ကြောင်း ဝါရာဇွပ် ပြည်သူ့စစ်တပ်ဖွဲ့က သတင်းထုတ်ပြန်ထားပါတယ်။
ဝါရာဇွပ်ရွာမှာရှိတဲ့ ဒေသခံလူထုတွေက ပြီးခဲ့တဲ့ တစ်ပတ်လောက်က ကြိုတင် တိမ်းရှောင်ခဲ့ကြကြောင်း ဒေသခံတွေဆီက သိရပါတယ်။
