မိုင်းဖိူမ်းဆငဲ၊ နိုဝင်ဘာ ၁၆ ရက်၊ မိုးကုတ်
မန္တလေးတိုင်း မိုးကုတ်မြို့က ဒေသခံ ထက်ဝက်ကျော်ဟာ မြို့ကနေ အခြားနေရာဒေသဘက်ကို နေ့စဉ်ထွက်ပြေးတိမ်းရှောင်နေကြရတယ်လို့ ဒေသခံတွေဆီကနေ သိရပါတယ်။
လာမယ့် နိုဝင်ဘာ ၂၅ ရက်မှာ TNLA က မိုးကုတ်မြို့ကနေ ပြန်လည်စွန့်ခွာသွားမှာဖြစ်ပြီး မြို့ထဲကို စစ်ကောင်စီတပ် ပြန်လည်ဝင်ရောက်လာတော့မယ်ဆိုတဲ့အတွက်ကြောင့် ထွက်ပြေးတိမ်းရှောင်နေကြတာ ဖြစ်ပါတယ်။
ဒေသခံတစ်ဦးက “မြို့ခံ ၆၀ ရာခိုင်နှုန်းလောက်က ပြေးကုန်ကြပြီ။ ကျန်တဲ့သူတွေက ကျောက်တူးတဲ့သူတွေ၊ ကျောက်လုပ်သမားတွေပဲ ကျန်တော့မှာ” လို့ ပြောပါတယ်။
မြို့ခံတွေဟာ တအာင်းတပ် ထိန်းချုပ်ရာ နမ့်ဆန်နဲ့ စစ်ကောင်စီထိန်းချုပ်ရာ ကျောက်မဲမြို့၊ မန္တလေးမြို့တွေဘက်ကို ထွက်ပြေးတိမ်းရှောင်ကြတာလို့ သိရပါတယ်။
မိုးကုတ် မြို့ခံ အမျိုးသမီးတစ်ဦးက “ထွက်ပြေးကြတဲ့သူတွေ ထွက်ပြေးကြပါပြီ။ ကျောက်မဲမှာတောင် ကားအစီး ၅၀၀ လောက်ပိတ်တယ်လို့ ပြောကြတာပဲ” လို့ ရွှေဖီမြေကို ပြောပါတယ်။
ဒါပေမယ့် မိုးကုတ်မြို့ကနေ ကျောက်မဲမြို့ကို တိမ်းရှောင်ကြတဲ့ တအာင်း (ပလောင်) လူမျိုးတွေကို စစ်ကောင်စီတပ်ဘက်က ကျောက်မဲမြို့ထဲကို ဖြတ်သန်းသွားလာခွင့်မပြုဘူးလို့ စုံစမ်းသိရှိရပါတယ်။
မိုးကုတ်မြို့ကနေ တအာင်းတပ် – PSLF/TNLA က ပြန်လည် ဆုတ်ခွာသွားမယ်လို့ သိရပေမယ့် မြို့ကို မိုးကုတ်ဗျူဟာတပ်၊ မန္တလေး ပြည်သူ့ကာကွယ်ရေးတပ်တို့က မြို့မကျရေးအတွက် ဆက်လက်ခုခံသွားမယ်လို့ ထုတ်ပြန်ထားကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
