မိုင်းရူပ၊ ဇန်နဝါရီ ၁၃ ရက်
ရှမ်းတောင်မှာ ပအိုဝ်းလူမျိုးတွေ အများစုနေထိုင်တဲ့ မြို့နယ် ၇ ခုထဲ ၁ နှစ်အတွင်း စစ်ကောင်စီတပ်က လေကြောင်းနဲ့ လက်နက်ကြီး တိုက်ခိုက်မှု ၅,၆၀၀ ကျော် ပြုလုပ်ခဲ့ရာ အရပ်သား ၁၂၇ ဦး သေဆုံးခဲ့တယ်လို့ ပအိုဝ်းလူငယ်အစည်းအရုံး- PYO ရဲ့ စာရင်းအရ သိရပါတယ်။
ဒီအချက်အလက်တွေဟာ ရှမ်းတောင် ဆီဆိုင်၊ ပင်လောင်း၊ ညောင်ရွှေ၊ ဟိုပုံး၊ မောက်မယ်၊ လွိုင်လင်နဲ့ ဖယ်ခုံ စတဲ့မြို့နယ်မှာ အချက်အလက် ကောက်ယူထားတာဖြစ်ပြီး လေကြောင်း တိုက်ခိုက်မှု ၅၀၀ ကြိမ်နဲ့ လက်နက်ကြီး ပစ်ခတ်တိုက်ခိုက်မှု ၅,၁၈၆ ကြိမ် ပြုလုပ်ခဲ့တယ်လို့ ဆိုပါတယ်။
အရပ်သား သေဆုံးမှုတွေထဲ လေကြောင်းတိုက်ခိုက်မှုအပြင် လက်နက်ကြီး၊ ဒရုန်း၊ မြေမြှုပ်မိုင်းနဲ့ သတ်ဖြတ်ခံရတာတွေ ပါဝင်ပြီး PYO က ရရှိထားတဲ့ စာရင်းအရ သေဆုံးသူတွေထဲ အမျိုးသား ၈၉ ဦး၊ အမျိုးသမီး ၁၆ ဦး၊ ကလေးငယ် ၁၆ ဦးနဲ့ ကျား မ အတည်မပြုနိုင်သူ ၆ ဦး ဖြစ်ပါတယ်။
ဒါ့အပြင် ရှမ်းတောင်ရှိ မြို့နယ် ၇ ခုမှာ စစ်ဘေးရှောင်နေတဲ့ ဒေသခံ ၆ သောင်းခွဲအထိ ရှိနေပြီး အရေးပေါ်အကူအညီ လိုအပ်နေတယ်လို့ PYO ရဲ့ တာဝန်ရှိသူတစ်ဦးက ပြောပါတယ်။
“စစ်ရှောင်တွေဟာ အခြေခံ လိုအပ်ချက်တွေအတွက် စိန်ခေါ်မှုတွေနဲ့ ကြုံနေရတယ်။ စစ်ရှောင်လာတာ ကြလာတဲ့အမျှ စားဝတ်နေရေး၊ ကျန်းမာရေးတွေကအစ အစစအရာရာ ကြပ်တည်းလာတယ်”
ဒီအချက်အလက်ဟာ PYO က မြေပြင်မှာ ဖြစ်ပွားနေတဲ့ သတင်းအချက်အလက်တွေကို စုဆောင်းတာ၊ နေ့စဥ် သတင်းဖော်ပြမှုတွေကို လေ့လာတာနဲ့ အင်တာဗျူးကနေတဆင့် အချက်အလက်တွေကို ကောက်ယူတာဖြစ်ပြီး မြေပြင်မှာ ဒီထက် ပိုများနိုင်တယ်လို့ သူမက ဆက်ပြောပါတယ်။
ရှမ်းတောင်မှာ စစ်တပ်၊ ပအိုဝ်းပြည်သူ့စစ်- PNO နဲ့ ကရင်နီ တော်လှန်ရေးအင်အားစု၊ ပအိုဝ်း တပ်မတော်- PNLA တို့အကြား တိုက်ပွဲ ဖြစ်ပွားနေတာ ဖြစ်ပါတယ်။
