လွေးလာဝ်ဇာရ်၊ ဒီဇင်ဘာ ၁ ရက်၊ မိုင်းရယ်
စစ်ကောင်စီတပ် အုပ်ချုပ်နေတဲ့ ရှမ်းမြောက် မိုင်းရယ်မြို့အထွက်က ဂိတ်တစ်ခုမှာ ကုန်ကားတွေကို စစ်ကောင်စီတပ်က ဖြတ်သန်းခွင့် မပေးတာကြောင့် ကား အစီးရေ ၅၀ ကျော် ပိတ်မိနေတယ်လို့ သိရှိသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ နိုဝင်ဘာ ၁၇ ရက်ကနေ ဒီနေ့ ဒီဇင်ဘာ ၁ ရက်နေ့အထိ ပေးမဖြတ်ပဲ ပိတ်ထားတာကြောင့် ကုန်ကားတွေက ပိတ်မိပြီး ကားသမားတွေ အခက်တွေ့နေကြတယ်လို့ ဆိုပါတယ်။
“သံတိုသံစတင်လာတဲ့ ကားသမားတွေ တခြားပစ္စည်းတင်တဲ့ကားတွေ အများကြီးဘဲ။ လမ်းမဖွင့်ပေးလို့ လမ်းမှာ ဒုက္ခရောက်နေကြတယ်။ ပိတ်မယ်ဆိုတဲ့အကြောင်းကို ဘာတစ်ခုမှ မပြောဘဲ ပိတ်ချလိုက်တဲ့အတွက် အရမ်းကို ဒုက္ခရောက်နေတယ်။ ဖွင့်ပေးမယ်ဆိုပြီး အခုချိန်ထိ မဖွင့်ပေးသေးဘူး။ မရှိတဲ့ကြားက ရင်းနှီးထားတဲ့ အရင်းအနှီးတွေလည်း ဘာမှမရှိတော့ဘူး” လို့ ပိတ်မိနေသူတစ်ဦးက ပြောပါတယ်။
ကန့်သတ်ကုန် မသယ်တဲ့ ကုန်ကားတွေကို လွှတ်ပေးသင့်တယ်လို့လည်း သူက ဆက်ပြောပါတယ်။
“ပြီးခဲ့တဲ့ တလောကမှ တရာဝင်အခွန်တွေဆိုပြီး ကွင်းဆင်းပြီး ကောက်တာ။ ဖြစ်စေချင်တာက သူတို့ သတ်မှတ်ထားတဲ့ ပစ္စည်းတွေပါတယ်ဆိုရင်လည်း စစ်ပြီး တားထားပေါ့။ မပါတဲ့ တချို့ကုန်ကားတွေကျတော့ ပေးဖြတ်လေနော်။ တရားဝင်ကုန်ကားတွေလည်း ရောနှောပြီးတော့ တားထားတာကျတော့ အဆင်မပြေဘူး”
ပြီးခဲ့တဲ့ နိုဝင်ဘာ ပထမအပတ်မှာလည်း စစ်ကောင်စီတပ်က တရုတ်ဘက်က တင်ပို့လာတဲ့ ကုန်ပစ္စည်းတွေကို မိုင်းရယ်မြို့ထဲသို့ ပေးမဖြတ်ဘူးလို့ သိရပါတယ်။
မိုင်းရယ်မြို့အဝင်အထွက်က စစ်ကောင်စီတပ်ရဲ့ အဲဒီဂိတ်မှာ ပြီးခဲ့တဲ့ ဩဂုတ်လကလည်း ဂိတ်လုံခြုံရေးအတွက်ဆိုပြီး ကုန်ကားသမားတွေထံ ငွေကြေးအဆမတန် ကောက်ခံတာတွေ ရှိပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
