မြတ်နိုး၊ မတ်လ ၂၁ ရက်၊ ဖားကန့်
ကချင်ပြည်နယ်၊ မိုးညင်းခရိုင်၊ ဖားကန့်မြို့နယ်၊ ဆိပ်မူကျေးရွာအုပ်စု၊ နမ့်မှော်ရွာမှာ ဒီနေ့ မတ်လ ၂၁ ရက် မနက် ၈ နာရီဝန်းကျင်လောက်မှာ နွံကန်ပေါက်ရာကနေ နမ့်မှော်ရွာက နေအိမ်တချို့ နွံမြုပ်သွားကြောင်း ဒေသခံတွေဆီက သိရပါတယ်။
“အပျက်အစီးတော့ မရှိဘူးဗျ။ လူထိခိုက်မှုလည်း မရှိဘူးဗျ။ လောလောဆယ် အိမ်တွေတော့ နည်းနည်းမြုပ် သွားတယ်ဗျ။ အနိမ့်ပိုင်းတွေက မလွတ်ဘူး။ အိမ်ခြေ ၅၀ ကျော် နွံတွေ ဝင်သွားတယ်။ လက်ရှိတော့ နွံတွေ မစီးတော့ပါဘူး။ ရပ်သွားပြီ” လို့ ဒေသခံတစ်ဦးက ပြောပါတယ်။
အိမ်ခြေ ၄ ရာကျော်ရှိတဲ့ နမ့်မှော်ရွာထဲမှာ ကူညီကယ်ဆယ်ရေးတွေ လုပ်နေပြီး အဲဒေသမှာ ကျောက်လုပ်ကွက်တွေ ရှိနေသေးသ၍ အခုလို အန္တရာယ်တွေက ဆက်လက်ဖြစ်လာနိုင်သေးတယ်လို့ သူက ဆက်ပြောပါတယ်။
ဖားကန့်မြို့နယ်မှာ အခုလို နွံကန်ကြီးတွေ အများအပြားရှိနေတာကြောင့် မိုးရာသီအတွက် ပိုပြီးစိုးရိမ်နေကြရတယ်လို့ ဒေသခံတွေက ပြောပါတယ်။
