လွေးဇွန်မိုး၊ နိုဝင်ဘာ ၁၁ ရက်၊ ပင်းတယ
ရှမ်းပြည်ပြန်လည်ထူထောင်ရေးကောင်စီ- RCSS က ဖမ်းဆီးသွားတဲ့ ရှမ်းတောင် ဓနုဒေသ ပင်းတယမြို့နယ်ထဲက လူငယ်အမျိုးသား ၂၀ ကျော်ကို လက်ရှိအချိန်ထိ ပြန်မလွှတ်ပေးသေးဘူးလို့ ဒေသခံတွေဆီက သိရပါတယ်။
ပြီးခဲ့တဲ့ အောက်တိုဘာ ၂၆ ရက်ကစပြီး မူးယစ်ဆေးဝါး သုံးစွဲတယ်ဆိုတဲ့ စွပ်စွဲချက်နဲ့ မိုင်းအင်၊ ဆင်ကျုံး၊ အိုးကုန်း၊ ကျောက်ပလ္လင်၊ တောင်ပု၊ မြေနီကုန်း စတဲ့ကျေးရွာက အသက် ၂၀ နဲ့ ၃၀ ဝန်းကျင်အရွယ် အမျိုးသား ၂၄ ဦးကို RCSS က ဖမ်းဆီးသွားတာဖြစ်ပြီး လက်ရှိအချိန်ထိ ပြန်မလွှတ်ပေးသေးဘူးလို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“သူတို့ဖမ်းသွားတဲ့လူတွေက ဘယ်ရောက်မှန်း မသိတော့ဘူး။ လိုက်လို့လည်း မရတော့ဘူးတဲ့။ (RCSS တပ်က) ထမင်းဆိုင်မှာ ခေါ်တွေ့တယ်။ ထမင်းတွေဘာတွေ ကျွေးရတယ်။ ထမင်းတွေပဲ စားပြီးတော့(ဖမ်းဆီးခံရသူတွေ) ဘယ်ရောက်လို့ ဘယ်နားမှန်းလည်း မသိဘူး။ အထက်လူကြီး အထက်လူကြီး အဲလိုပဲ ပြောနေတယ်တဲ့။ သူတို့ဖမ်းသွားတဲ့အချိန် ထွက်ပြေးသွားတာ တစ်ယောက် ရှိတယ်လေ။ သူက လွှတ်သွားတာလား မသိဘူး။ သေနတ်နဲ့ ၁၀ ချက်လောက် လိုက်ပစ်တယ်လို့ ပြောတာပဲ။ ဒါပေမဲ့ လွှတ်သွားတယ်ထင်တယ်။ ဒဏ်ရာ ရမရတော့ မသိဘူး”
ထွက်ပြေးသွားတဲ့ အမျိုးသားတစ်ဦးရဲ့နေအိမ်ကို RCSS တပ်က ပြီးခဲ့တဲ့ အောက်တိုဘာ ၂၉ ရက်မှာ လာရောက် ချိတ်ပိတ်သွားခဲ့ပြီး RCSS ချိတ်ပိတ်သွားတဲ့နေအိမ်ကို စစ်တပ်က ပြီးခဲ့တဲ့ နိုဝင်ဘာ ၁ ရက်မှာ လာဖွင့်ပေးခဲ့တယ်လို့ ဆိုပါတယ်။
လက်ရှိ ဖမ်းဆီးခံထားရတဲ့ အမျိုးသားတွေကိုလည်း RCSS တပ်က ဘယ်နေရာမှာ ထိန်းသိမ်းထားလဲဆိုတာ မသိရဘူးလို့ အထက်ပါ အမျိုးသားက ဆက်ပြောပါတယ်။
ရပ်စောက်က ဗထူးတပ်ရဲ့ အကူအညီ တောင်းမှုကြောင့် RCSS တပ်က ပင်းတယမြို့နယ် မိုင်းအင်ရွာအဝင်မှာ လုံခြုံရေးအတွက်ဆိုပြီး လာရောက် တပ်စွဲထားတယ်လို့ ဒေသခံတွေက ရွှေဖီမြေသို့ ပြောဆိုထားဖူးပါတယ်။
ပြီးခဲ့တဲ့ အောက်တိုဘာ ၂၈ ရက် မနက် ၁၀ နာရီဝန်းကျင်မှာလည်း ရပ်စောက်မြို့နယ် လှည်းတိုးရွာကနေ ပင်းတယမြို့နယ် မိုင်အင်ရွာဘက်လာတဲ့ ၂၃ နှစ်အရွယ် ကိုရဲဝင်းနိုင်ကို မိုင်းအင်ရွာအဝင်ရှိ RCSS ရဲ့ စစ်ဆေးရေးဂိတ်က ကား တားရာမှာ ကားမရပ်လို့ဆိုပြီး ပစ်သတ်ခဲ့တယ်လို့ ဒေသခံတွေဆီက သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
