ပျားကြီး၊ ဧပြီ ၄ ရက်၊ မန္တလေး
အမရပူရမြို့နယ် ရတနာ့ဂူ ကိုယ်ရံတော်ဗလီ ပြိုကျမှုမှာ သေဆုံးသူ ရုပ်အလောင်း ၁,၁၀၀ ကျော် ရရှိထားပြီး ရှာဖွေဖို့ ကျန်နေသေးသူတွေလည်း အများစု ကျန်ရှိနေသေးတယ်လို့ ဒေသခံတွေက ပြောပါတယ်။
မတ်လ ၂၈ ရက်က လှုပ်ခတ်ခဲ့တဲ့ အင်အားပြင်းငလျင် လှုပ်ခတ်မှုကြောင့် ဗလီ ပြိုကျပျက်စီးခဲ့တာဖြစ်ပြီး ဝတ်ပြုဆုတောင်းနေသူအားလုံး ပိတ်မိနေခဲ့တာ ဖြစ်ပါတယ်။
“တစ်ယောက်ချင်း သင်္ဂြိုလ်ဖို့ မဖြစ်နိုင်တော့လို့ ကွင်းပြင်မှာပဲ ယောကျာ်းသပ်သပ်၊ မိန်းမသပ်သပ်၊ ကလေးသပ်သပ်ခွဲပြီး တန်းစီသင်္ဂြိုလ်လိုက်ရတာ” လို့ ဒေသခံ အစ္စလာမ်ဘာသာဝင် အမျိုးသားတစ်ဦးက ပြောပါတယ်။
ဝတ်ပြုဆုတောင်းဆောင် ၅ ဆောင်ရှိပြီး တစ်ဆောင်ချင်းစီမှာ လူပေါင်း ၅၀၀ အထိတစ်ပြိုင်နက်တည်း ဝတ်ပြုဆုတောင်းနိုင်တဲ့ ကိုယ်ရံတော် ဗလီအတွင်း ငလျင်လှုပ်ခတ်ချိန်မှာ အဆောင် ၁ ခုမှာ ဝတ်ပြုနေသူ ၃၀၀ ကနေ ၄၀၀ ကြားအထိ ရှိနိုင်တယ်လို့ ဒေသခံ အစ္စလာမ်ဘာသာဝင်တွေက ခန့်မှန်းထားကြပါတယ်။
မတ်လ ၂၈ ရက်က လှုပ်ခတ်ခဲ့တဲ့ အင်အားပြင်း ငလျင်ကြောင့် မန္တလေးမြို့မှာ ဘာသာရေးအဆောက်အဦးအပါအဝင် အဆောက်အဦးပေါင်း ၂ ထောင်နီးပါး ပြိုကျပျက်စီးခဲ့ပြီး ဧပြီ ၃ ရက် ညပိုင်းအထိ ရရှိထားတဲ့ အချက်အလက်အရ သေဆုံးသူ ၃ ထောင်နီးပါးအထိ ရှိလာတယ်လို့ ဒေသခံ ပရဟိတအသင်းခေါင်းဆောင်တစ်ဦးက ပြောဆိုပါတယ်။
